Test
Zimbabwe kukumbwa na ukosefu wa mikate

Wananchi wa Zimbabwe huenda wakakosa mikate kuanzia wiki ijayo baada ya Serikali kushindwa kulipia ngano inayoingizwa nchini humo kutoka nje kwa ajili ya kutengeneza chakula hicho.

Mikate ndio chakula cha pili kwa matumizi nchini Zimbabwe ikitanguliwa na mahindi.

Meneja mkuu wa Chama cha Wasagaji Ngano (GMAZ) nchini humo, Lynette Veremu amekiandikia barua Chama cha Taifa cha Waokaji Mikate kuwaeleza kuwa tani za ngano zilizopo nchini Zimbabwe ni 5,800 na zitadumu kwa siku  nane (8) tu huku tani 55,000 za ngano zikiwa zimekwama nchini Msumbiji kwa kuwa hazijalipiwa.

Serikali yasikiliza kilio cha wafanyabiashra wa DR Congo

Serikali imeanza kushughulikia malalamiko ya wafanyabiashara wa Congo wanaotumia bandari ya Dar es Salaam ambao waliilalamikia mamlaka ya Forodha kuzuia mizigo yao kwa muda mrefu na kuwasabibishia hasara.

Jana wafanyabiashara hao walimuomba Rais Magufuli kuingilia kati mgogoro huo ili waweze kuendelea kuitumia bandari hiyo ambapo tayari baadhi ya makontena yameanza kutolewa.

Zaidi ya makontena 900 yametajwa kukwama katika Bandari ya Dar es Salaam ambapo jana Kamishna wa Forodha na ushuru wa bidhaa  wa Mamlaka ya Mapato Tanzania, Ben Usaje Asubisye alibainisha tatizo lililopo ni pamoja na kukosekana kwa nyaraka sahihi.

Waziri wa Ujenzi, Uchukuzi na Mawasiliano, Mhandisi Isack Kamwelwe, Leo Jumanne akizungumza na wafanyabiashara  hao na viongozi wa mamlaka husika amesema kulikuwa na changamoto kadhaa wakati wa zoezi la usafirishaji wa mizigo hiyo ikiwemo ufaulishaji wa mizigo, lakini tayari zimeshafanyiwa kazi kurahisisha zoezi hilo na utaratibu mpya umewekwa.

Aidha ameongeza kuwa, licha ya kuruhusu ufaulishaji wa mizigo hiyo kutoka kwenye makontena, serikali itaweka sheria kali na usimamizi madhubuti ili kuepuka ujanja unaoweza kuijitokeza na kuikosesha serikali mapato.

Kuhusu ada iliyokuwa ikilipwa na wafanyabiashara kwa watumishi wa TRA kwa ajili ya kusindikiza mizigo hiyo, Kamwelwe ametangaza kuondolewa kwa ada hiyo na badala yake utaratibu muafaka utawekwa kwa kushirikiana na ubalozi wa DR Congo nchini

Waokota makopo kupewa vitambulisho Ruvuma

 

Mkuu wa Mkoa wa Ruvuma Christina Mndeme amezitaka Halmashauri zote za mkoani hapo kuhakikisha zina gawa vitambulisho kwa watu wote wenye sifa kuanzia wenye mtaji wa chini ya milioni nne, wakiwemo wakulima na waokota makopo barabarani.

“Tunawagawia wote vitambulisho…mpaka wale wanaookota makopo barabarani,”alisema RC Mndeme.

Halmashauri ya manispaa ya songea inaelezwa kuwa na idadi kubwa ya wafanyabiashara,kati ya Halmashauri nane za mkoa wa Ruvuma na inatakiwa kukusanya million 300 fedha itokanayo na vitambulisho vya wafanyabiashara wadogowadogo ambpo hadi sasa imekusanya million 90 lakini madiwani wanadai kuna changamoto.

Mkuu wa mkoa wa Ruvuma bi Christina Mndeme amesema Vitambulisho hivyo vinatakiwa kutolewa kwa watu wotewenye sifa.

TANTRADE kuwakutanisha wazalishaji wa bidhaa za Tanzania JKNIC

Mamlaka ya Maendeleo ya Biashara ya Tanzania (TANTRADE) kwa kushirikiana na Taasisi inayosimamia Biashara ya Kimataifa ya Ukraine (Trade with Ukraine) inatarajiwa kuwa na mkutano maalumu wa kujadili fursa za kibishara utakaofanyika Februari 19 jijini Dar es Salaam.

Kwa mujibu wa taarifa kutoka Kitengo cha Mawasiliano cha TANTRADE kwa vyombo vya habari, mkutano huo unalenga kujadili na kuainisha mahitaji ya bidhaa na mbinu za kibiashara kwa pamoja kati ya kampuni za Tanzania na Ukraine.

Taarifa hiyo imewataja walengwa wa mkutano huo kuwa ni pamoja na wazalishaji wa kahawa, viungo, chai, chia, ufuta na matunda ambao wana uwezo wa kuuza nje ya nchi pamoja na wauzaji wa dawa za aina yoyote.

Mkutano huo utaanza saa nne asubuhi katika Uwanja wa Maonesho wa Mwl J.K.Nyerere.

Sababu za zao la ndizi kudorora Kagera zatajwa

Ukame uliosababisha ardhi kuchoka, magonjwa na elimu ndogo kwa wakulima kuhusiana na utunzaji wa mashamba ya migomba ni sababu zilizochangia kilimo cha migomba kudorora na kusababisha upungufu mkubwa wa zao la ndizi ambalo hutegemewa kwa chakula kwa wakazi wa Mkoa wa Kagera.

Kwa miaka ya hivi karibuni kumekuwepo mabadiliko makubwa huku kilimo cha migomba kikishuka na hivyo nguvu za wakulima kutozaa matunda kulingana na matarajio yao.

Mmoja wa wakulima wa migomba katika Kijiji cha Butulage, Kata ya Izimbya wilaya ya Bukoba mkoani Kagera, amesema uzalishaji wa ndizi unapungua katika shamba lake kutokana na ukweli kwamba hawakuwa na elimu ya kutosha kuhusu kilimo bora na namna bora ya kutumia mbolea ili ardhi isichoke.

Kilimo cha migomba hususan katika Mkoa wa Kagera, kinadaiwa pia kuwa kimeharibiwa na kilimo mseto ambacho hutumiwa na wakulima wengi katika mkoa huo.

Kutokana na upungufu mkubwa wa rutuba katika ardhi pamoja na ukame, Kituo cha Utafiti  wa Kilimo cha Maruku kimeanza kuhamasisha matumizi ya bioteknolojia katika kilimo kwa kutumia mbolea za viwandani na za asili, kwenye mashamba ya wakulima katika  Wilaya ya Bukoba ambayo yatatumika kama mfano kwa wakulima.

Taarifa za watafiti zinaonesha kuwa 10 iliyopita ndizi moja iliyokomaa ilikuwa na wastani wa uzito wa kilo 15 hadi 20, lakini kwa sasa ndizi zinazovunwa zinakuwa na uzito wa kilo tano hadi saba.

Ujumbe wa Marekani watinga China kumaliza vita ya kibiashara

Ujumbe wa Marekani ukiongozwa na Waziri wa Fedha, Steven Mnuchin yuko mjini Beijing China kwa ajili ya makubaliano ya kibiashara yanayolenga kumaliza vita vya vikwazo vya kodi baina ya nchi hizo mbili.

Mkutano huo uliopangwa kufanyika Alhamisi umetanguliwa na mazungumzo ya awali kati ya maafisa wa Marekani na China tangu Jumatatu.

Mazungumzo hayo ya Alhamisi yanakuja kukiwa na malalamiko ya pande zote, China ikisema sera za Marekani za kibiashara za kulinda maslahi kwa kisingizo cha Usalama wa Taifa zimekuwa na athari hasi ya moja kwa moja kwa kampuni za China kibiashara.

Mfano wa athari hasi umeikumba Kampuni kubwa ya mawasiliano ya China ya Huawei ambayo inapata ukinzani wa bidhaa zake kutokukubalika na nchi mbalimbali zikiongozwa na Marekani kwa madai ya usalama wa mataifa hayo.

Serikali yatangaza kufuta kodi ya VAT kwenye madini

Serikali imesema imeendelea kutekeleza maelekezo ya Rais John Magufuli aliyoyatoa Januari 22, 2019, alipokutana na wadau wa sekta ya madini na moja ya utekelezaji huo ni kufuta kodi ya Ongezeko la Thamani (VAT) na Kodi ya Zuio ya asilimia tano ya mwisho inayotozwa kwenye bei ya kuuzia madini ya aina zote kwa wachimbaji hao.

Hayo yamewekwa bayana na Waziri Mkuu Kassim Majaliwa alipokuwa akiahirisha vikao vya Bunge la Kumi na Nne jijini Dodoma leo, Februari 9,2019.

Waziri Mkuu amesema hatua hiyo inatarajiwa kupunguza utoroshwaji wa madini; kuwatambua wachimbaji wadogo kupitia masoko ya madini yatakayoanzishwa pamoja na kusaidia kuwapunguzia gharama wachimbaji wadogo na hivyo kuendesha shughuli zao kwa ufanisi pamoja na kuongeza wigo wa mapato kwa kuwa madini yatauzwa ndani ya nchi.

Nitoe rai kwa wachimbaji wote wadogo kushirikiana na Mamlaka mbalimbali za Serikali kutekeleza maazimio yaliyofikiwa katika kikao na mheshimiwa Rais.”

Amesema siku zote Watanzania wanamuenzi Rais Magufuli, kwa hatua za makusudi anazochukua katika kuhakikisha anaimarisha mifumo ya ukusanyaji wa mapato.

Waziri Mkuu amesema Rais Magufuli anafanya hayo yote kwa lengo la kuona Tanzania inapunguza utegemezi wa misaada kutoka katika mataifa mengine.

“Mifano maelekezo aliyoyatoa kwa mawaziri, wakuu wa mikoa wawasilishe mapendekezo kuhusu namna bora ya kuongeza ukusanyaji wa mapato ya ndani katika maeneo yao.”

Waziri mkuu amesema tayari Serikali imeshapokea mapendekezo hayo na imetoa maagizo mahsusi kwa TRA na TAMISEMI zishirikiane katika ukusanyaji wa kodi za majengo.

Akizungumzia kuhusu hali ya uchumi, waziri mkuu amesema imeendelea kuimarika, ambapo kati ya Januari hadi Septemba 2018, pato la Taifa lilikua kwa wastani wa asilimia 6.7 ikilinganishwa na asilimia 6.2 katika kipindi kama hicho mwaka 2017.

Amesema Ongezeko hilo la ukuaji wa uchumi limechochewa zaidi na uwekezaji mkubwa kwenye miundombinu hususan ujenzi wa barabara, reli na viwanja vya ndege.

Waziri Mkuu amesema masuala mengine yaliyochangia ukuaji mzuri wa uchumi ni kutengemaa kwa upatikanaji wa nishati na hali nzuri ya hewa kwa upande wa kilimo.

“Shughuli za kiuchumi zilizoendelea kutoa mchango mkubwa katika pato la Taifa kwa kipindi hicho ni kilimo (asilimia 33.4), ujenzi (asilimia 15.7) na biashara (asilimia 10.2).”

Amesema kutokana na umuhimu wa sekta ya kilimo, Serikali itaendelea kuboresha miundombinu ya umwagiliaji, kuhakikisha pembejeo za kilimo zinapatikana kwa wakati.

Pia kuhakikisha huduma za ugani zinaimarishwa katika maeneo yote nchini pamoja na  kuboresha upatikanaji wa miundombinu ya hifadhi na masoko.

Lengo la Serikali ni kuongeza tija kwenye uzalishaji wa mazao ya kilimo na hivyo kumwongezea kipato mkulima kitakachomwezesha kujikimu na kujikwamua na umaskini.