Test
TAA yaja na tozo mpya ya usalama wa abiria

 

Mamlaka ya Viwanja vya Ndege Tanzania (TAA), imewataarifu Waendeshaji wa Mashirika ya ndege za abiria zinazofanya safari zake kuanzia Kiwanja cha Ndege cha Kimataifa cha Julius Nyerere (JNIA) juu ya tozo mpya ya usalama wa abiria.

Mkurugenzi Mkuu wa TAA, Richard Mayongela amewaeleza kuwa utekelezaji wa tozo hiyo ambayo ni dola tano (5) kwa abiria wa nje ya nchi na abiria wa ndani ni sh. 5,000 utaanza rasmi tarehe 1 Oktoba, 2018.

Mayongela amesema lengo la tozo hiyo ni uboreshwaji wa huduma na miundombinu ya Usalama katika Viwanja vya Ndege nchini ili kuhakikisha vinafikia viwango vya ubora vya Kimataifa na pia kutoa huduma bora za kiusalama kwa wadau wake.

Akitoa ufafanuzi zaidi kuhusiana na ada hiyo Kaimu Mkurugenzi wa Fedha na Biashara wa TAA, Pius Wankali ameeleza kwamba agizo la ukusanywaji wa tozo  hiyo ulitangazwa rasmi na Mamlaka ya Usafiri wa  Anga (TCAA) mwezi Juni mwaka huu.

“Tangazo la kuanzishwa kwa tozo hii lilichapishwa na TCAA kutoka kwenye nyaraka AIC Doc No. TCAA/FRM/ANS/AIS-30, tarehe 29 Juni, 2018 na utekelezaji wake utakuwa ni kuanzia Oktoba Mosi, 2018," amesema Wankali.

Kwa upande wa wawakilishi wa mashirika ya ndege kubwa kutoka Shirika la ndege Tanzania (ATCL), Ismail Ismail alitaka kuwepo kwa maelezo ya kina juu ya tozo hiyo, ambayo alitaka ijumuishwe ndani ya tiketi ili abiria awe ameilipia moja kwa moja.

Kwa upande wake mwakilishi mwingine wa ndege kubwa ya KLM, Bw. Alexander Van de Wint ameomba tozo hii ianze baadaye mwakani kutokana na wao tayari wameshauza tiketi za msimu hadi Desemba 2018 ili wasiwaumize abiria wao.

Mwenyekiti wa Waendeshaji wa Ndege ndogo za abiria, Chief Uyeka Rumbyambya amesema kuwe na taratibu za kumuhusisha Mkurugenzi Mkuu katika mikutano mbalimbali ya Waendeshaji wa Mashirika ya ndege, ili waweze kuwasilisha.

Naye Kaimu Meneja Mipango na Takwimu wa TAA, ambaye ni mratibu wa mkutano huo, Bw. Nasib Elias alitoa ufafanuzi juu ya ukusanywaji wa tozo hii, ambayo inatarajiwa pia kuwa ni moja ya chanzo cha mapato cha Mamlaka.

Wafanyabiashara wa nyavu Tarime 'vicheko'

Serikali imeruhusu utoaji vibali kwa wafanyabishara mbalimbali wanaojihusisha na uuzaji wa nyavu za kuvulia nchini baada ya kujiridhisha na uwekaji wa njia sahihi ya kufuatilia nyavu zinazoingizwa.

Naibu waziri wa Mifugo na Uvuvi, Abdalla Ulega ametoa kauli hiyo Wilaya ya Tarime mkoani Mara baada ya kukagua baadhi ya shehena za nyavu zilizokuwa zimezuiwa katika ghala lililopo Sirari Mpakani mwa Tanzania na Kenya.

Amesema pamoja na kuruhusu vibali hivyo lakini bado serikali itaendelea kupambana na wale wote watakaojihusisha na uingizaji wa nyavu zisizofaa  kwa uvuvi nchini.

Nao baadhi ya wafanyabiashara walioruhusiwa kutoa nyavu hizo wameeleza kufurahishwa kwao na uamuzi huo wa serikali na kuiomba serikali kuweka utaratibu mzuri wa kuwezesha vibali vitoke kwa wakati kutoka na ucheleweshaji huo kuwarudisha nyuma kimaendeleo.

Katika eneo hilo Naibu waziri huyo alikabidhi baadhi ya vibali kwa wafanyabishara ambao walikuwa na Shehena ya mzigo uliokuwa mpakani hapo.

TIC yafunguka kuhusu wawekezaji kulazimishwa madeni ya nyuma

Kituo cha Uwekezaji Tanzania (TIC) kimesema ni lazima sasa kila taasisi na viongozi wa serikali kusimamia mipaka yake katika kuwachukulia hatua wawekezaji na siyo kutoa amri za kukamatwa ama kukadiriwa kwa kodi za mwekezaji huku mamlaka husika zikiwa hazina taarifa zozote za mwekezaji huyo.

Kauli hiyo imetolewa na Mkurugenzi Mtendaji wa Kituo cha Uwekezaji cha TIC, GEOFFREY MWAMBE alipozungumza na waandishi wa habari jijini Dar es Salaam ambapo pia ameitaka Mamlaka ya Mapato Tanzania (TRA) kutompa deni la kodi ya mwekezaji aliyemaliza muda wake mwekezaji mpya wakati mwekezaji aliyekuwepo alifanya uzembe wa kufuatiliwa kwa kodi hiyo.

Katika kuhakikishaki wanafikia malengo waliyojiwekea. Kituo cha Uwekezaji (TIC) kimeweka bayana kuwa kinafanya kila linalowezekana kuwasaka wawekezaji sehemu mbalimbali duniani na kuweka mazingira wezeshi ya kuja kuwekeza nchini ambapo kwa sasa baada ya ziara yao nchini Korea Kusini na China, Kampuni tano zimeonesha nia ya kuja kuwekeza katika uzalishaji wa dawa na vifaa tiba

Juhudi hizo za kusaka wawekezaji sehemu mbalimbali ndizo zinamsukuma mkurugenzi mtendaji kutoa tamko kwa viongozi mbalimbali wa serikali na baadhi ya taasisi juu ya kuwachukulia hatua wawekezaji katika maeneo yao bila mamlaka husika kujulishwa.

Sambamba na hilo mkurugnezi huyo ameitaka Mamlaka ya Mapato Tanzania (TRA) kusimamia vema ukusanyaji wa kodi kwa wawekezaji waliopo kabla  hawajaondoka nchini na kuacha deni  linalokuja kuwa mwiba kwa mwekezaji ambaye atachukua nafasi katika kiwanda husika.

Kituo cha Uwekezaji Tanzania (TIC) kimesema kimeweka utaratibu kwa wawekezaji wote kupata huduma za taasisi mbalimbali katika kutafuta mchakato wa kuwekeza nchini katika kituo hicho ili kuondoa usumbufu wa wawekezaji hao kwenda kuzifuata taasisi hizo sehemu mbalimbali. 

Wakwepa kodi Afrika Mashariki kubanwa zaidi

Wafanyabiashara katika Ukanda wa Afrika Mashariki wamesisitizwa kufuata sheria na kanuni za ulipaji kodi ili kuepusha changamoto zinazojitokeza za ukwepaji kodi.

Katika kulisimamia hilo,  Kamati ya Ufundi ya Makamishna wa Uchunguzi wa Kodi wa Afrika Mashariki leo, Jumatatu wamekutana Zanzibar kutengeneza mpango wa pamoja wa usimamizi katika kupambana na wakwepaji kodi katika ukanda wa Afrika Mashariki.

Akizungummzia malengo ya mkutano huo, Kaimu Naibu Kamishna wa Upepelezi wa Kodi, Salimu Kessi  amesema, wakwepaji kodi wamekuwa na mbinu mbalimbali hivyo kupitia mkutano huo wanaamini wataweza kuendelea na mapambano ya kuwadhibiti wakwepaji kodi hao kwa  asilimia kubwa .

Wakizungumzia kikao hicho makamishna hao wamesema, mkutano huo utaweza kutoka na mbinu mpya sambamba na namna ya kukabiliana na changamoto za mizigo zinazosafirishwa bila kulipiwa ushuru.

Mkutano huo umezikutanisha nchi za Afrika Mashariki zikiwemo Uganda, Tanzania, Kenya, Rwanda, Uganda na Burundi.

Benki za kibiashara sasa kukopesha kwa riba ndogo zaidi

Baada ya Benki Kuu ya Tanzania (BoT) kupunguza riba kwa benki nchini kutoka asilimia tisa hadi saba, Watanzania wengi sasa watapata ahueni ya kukopeshwa kwa riba ndogo na kwa muda mrefu kuliko ilibyokuwa hapo mwanzo.

Punguzo hilo la riba litaanza rasmi Agosti 27 na litaendelea hadi yatakapofanyika mapitio mapya.

Barua ya Naibu Gavana wa BoT anayesimamia sera za uchumi na fedha (EFP), Dk Yamungu Kayandabila iliyoandikwa Agosti 23 kwenda kwa benki za biashara na taasisi za fedha inabainisha kushuka kwa riba hiyo kwa asilimia mbili huku utekelezaji wake ukielezwa kuanza kesho.

“Kama nilivyowaeleza kwenye waraka wa Agosti 3, 2017, nawafahamisha kupungua kwa riba itakayotozwa kwenye mikopo yote ambayo benki za biashara zitakopa kutoka Benki Kuu pamoja na amana za Serikali mpaka asilimia saba kutoka asilimia tisa iliyokuwapo (na) itakayotumika mpaka marekebisho mengine yatakapofanyika,” inasomeka taarifa hiyo. Nakala ya barua hiyo pia imepelekwa kwa katibu mkuu Wizara ya Fedha na Mipango.

Nakala nyingine imekwenda kwa Mwakilishi Mkaazi wa Shirika la Fedha Duniani (IMF) na Kamishna wa Mamlaka ya Mapato (TRA).

Katika taarifa hiyo, Dk Kayandabila alisema mabadiliko hayo yamezingatia mwenendo wa mauzo ya hatifungani za Serikali hasa zinazoiva baada ya siku 91 au 182.

“Mapitio haya yanadhihirisha juhudi za makusudi kukuza kiasi cha mikopo inayotolewa kufanikisha shughuli za uchumi,” ameandika Naibu Gavana kwenye taarifa yake kwa umma.

Wakulima wa mahindi Arumeru walilia utaalamu

Wakulima wa Mahindi Wilaya ya Arumeru Mkoani Arusha wamewaomba wataalamu wa kilimo kufika katika maeneo yao na kupima udongo ili kubaini aina ya mazao ya kibiashara yanayokubali kutokana na kilimo cha mahindi kukosa tija.

Kilio hicho cha Wakulima wa Arumeru kimetolewa wakati wataalamu wa Taasisi ya Utafiti wa Kilimo Tanzania kutoka SELIANI walipowatembelea wanufaika wa mradi wa majaribio wa kilimo cha taarifa kwa njia ya simu.

Kilio cha Wakulima hao wa Arumeru ni kile wanachodai  mazao duni katika mashamba yao kutokana na udongo uliopo na kwamba hawafahamu namna ya kutumia mbolea katika ardhi hiyo au ni mazao gani zaidi yanatakiwa kustawi zaidi.

Antipasi Patrick, Ni mtafiti wa kilimo kutoka Kituo cha Utafiti, SELIAN Arusha amesema licha ya kufanikiwa kufikia malengo waliyojiwekea changamoto ni kwa wakulima kutokupata pembejeo kwa wakati hali iliyochangia kushuka kwa mazao

Aidha akijibu malalamiko ya wao kutofika kwa wakulima kutoa elimu na mafunzo ya namna ya kufanya kilimo cha kisasa na bora zaidi, afisa huyo amesema changamoto kubwa iliyopo ni uhaba wa watumishi hao ambao hadi sasa wako wawili katika maeneo ya Magugu na kuwasisitiza wakulima hao kujiunga katika vikundi ili waweze kutembelewa na kutatuliwa matatizo yao.

Katika mradi huo, wakulima huweza kupata taarifa kwa njia ya Simu na kubaini mahitaji ya msingi katika shamba ikiwemo vipimo halisi na aina ya mbolea inayofaa kutumika eneo hilo  na unatekelezwa katika nchi Tatu barani Afrika huku Tanzania ukiwa katika wilaya kumi na mbili.

Magugu wakiri kulima matikiti bila utaalamu

Wakulima wa matikiti maji katika Mji wa Magugu wilayani Babati mkoani Manyara wamekiri kulima kwa mazoea kutokana na wataalamu wa kilimo kutofika katika mashamba yao hivyo kukosa elimu ya kutunza shamba na matumizi sahihi ya mbolea.

Wakulima wa matikiti maji wameiambia Azam News kuwa wameamua kulima kilimo cha mazoea kutokana na kutokuwa na utaalamu tangu wanapoanza mchakato wa  kuandaa shamba hadi kufikia kwenye matumizi ya mbolea.

Wamesema, wamekuwa katika wakati mgumu hususan wakati wa kupanda, uchaguzi wa mbolea pamoja na matumizi ya udongo, na hivyo kuamua kuendelea na kilimo hicho kwa namna wanavyofahamu wao na kuwalaumu wataalam hao wa kilimo kwa kuendelea kukaa ofisini.

Mkuu wa Idara ya Kilimo, Umwagiliaji na Ushirika wa Halmashauri ya Wilaya ya Babati, Getrida Kyekaka amesema upungufu wa wataalamu wa kilimo katika Wilaya ya Babati unachangia kukwamisha mikakati ya idara hiyo  kuwafikia wakulima na kuwataka wajiunge katika vikundi ili waweze kufikiwa kwa pamoja.

Kilimo cha matikiti maji kinatajwa kuwa na faida kubwa  endapo mkulima atafuata kanuni bora za kilimo hicho.