Latest News
Rukwa waanzisha kampeni kukomesha udumavu kwa watoto

Mkoa wa Rukwa kupitia Kampeni ya Lishe Endelevu umedhamiria kutokomeza tatizo la udumavu na utapiamlo unaowakumba watoto walio chini ya umri wa miaka mitano ambapo tatizo hilo limekuwa likiikumba Rukwa licha ya kuwa ni miongoni mwa mikoa inayoongoza kwa uzalishaji wa chakula nchini.

Wataalamu wa afya wanasema moja ya sababu za udumavu na utapiamlo ni mazoea ya kula mlo unaofanana kila siku hali inayochangia Mkoa wa Rukwa kuwa na kiwango kikubwa cha watoto wenye matatizo hayo kwa asilimia 56.

Kuzinduliwa kwa kampeni hiyo na Kaimu Mkuu wa mkoa wa Rukwa, Dk. Alfan Haule inalenga kuondokana na hali hiyo ndani ya miaka minne na kuhamasisha lishe endelevu ambayo huenda ikawazindua wakazi wa mkoa huo hususan waishio vijijini na kuwawezesha kubadili fikra huku wakiondokana na  mazoea ya kula vyakula pasipo kuzingatia mlo kamili kiasi cha kuleta udumavu na utapiamlo kwa watoto wao.

Mahindi na maharage ni baadhi ya vyakula ambavyo hutumiwa sana na wananchi mkoani humu  lakini suala la matunda linaonekana siyo kipaumbele kwao

Mkoa wa Rukwa ndiyo unaoshika namba moja kwa tatizo la udumavu kati ya mikoa yote nchini ambayo watoto wake wengi wana udumavu uliokithiri na kupitia kampeni ya Lishe Endelevu ya kupambana na matokeo hayo.

Latest News
Longido waanza kunufaida na mradi wa maji wa mabilioni

Wakazi wa Mji wa Longido na maeneo ya jirani mkoani Arusha wameanza kupata huduma ya Maji Safi na Salama baada ya kuanza kukamilika kwa Mradi wa Maji wenye thamani ya Shilingi Bilioni 15.8 unaotarajiwa kukabidhiwa rasmi mwishoni mwa mwezi huu.

Hadi kuelekea kukamilika kwake mradi huo ulioanza kutekelezwa tangu mwaka 2017 unataraji kutoa maji yatakayowanufaisha wakazi takribani 67,000 wa eneo hilo ambalo wengi wao ni kutoka jamii ya kifugaji.

Mbele ya Kamati ya Kudumu ya Bunge ya Kilimo, Mifugo na Maji iliyofika Longido kutazama utekelezaji wa mradi huo, wananchi wa wilaya hiyo mbali ya kueleza furaha waliyonayo baada ya huduma ya maji kuwafikia vilevile  wametoa wito wa kuongezwa kwa vituo vya upatikanaji wa maji  hayo pamoja na sehemu za kunyweshea mifugo yao.

Mkurugenzi wa Mamlaka ya Maji Safi na Usafi wa Mazingira Jiji la Arusha (AUWSA), Mhandisi Ruth Koya ameiambia Kamati hiyo kwamba mradi huo umekamilika kwa asilimia 90.

Mahamoud Mgimwa ambaye ndiye Mwenyekiti wa Kamati ya Kudumu ya Bunge ya Kilimo, Mifugo na Maji, amesema Kamati yake inataraji kuona utunzaji wa miundombinu ya Maji ili mradi huo udumu na kuwanufaisha wananchi wengi zaidi.

Mradi huo chanzo chake ni katika Mto Simba uliopo wilayani Siha mkoani Kilimanjaro na una urefu wa kilomita 63 hadi katika Mji wa Longido.

Latest News
Rais Magufuli akutana na ujumbe kutoka Qatar

Rais John Magufuli leo Machi, 21 amekutana na kufanya mazungumzo na Naibu Waziri Mkuu na Waziri wa Mambo ya Nje wa Qatar, Sheikh Mohammed bin Abdulrahman Al Thani, Ikulu Jijini Dar es Salaam.

Mara baada ya kukutana, viongozi hao wamezungumzia uhusiano na ushirikiano mzuri uliopo kati ya Tanzania na Qatar na dhamira yao ya kuhakikisha uhusiano na ushirikiano huo unaendelezwa na kukuzwa zaidi katika masuala ya uwekezaji katika gesi, madini, utalii na miundombinu ya barabara, bandari, nishati, reli na huduma za kijamii.

Akizungumzia ujio huo, Rais Magufuli amemshukuru Sheikh Mohammed kwa kufika nchini pamoja ujumbe wa wawekezaji wenye dhamira ya kuwekeza nchini na amemuomba ampelekee salamu za shukrani kwa Mtawala wa Taifa la Qatar, Sheikh Tamim bin Hamad Al Thani kwa kuendeleza uhusiano na Tanzania.

Rais Magufuli amesema Tanzania inazo fursa nyingi za uwekezaji zikiwemo uchakataji wa gesi, madini, utalii na usafiri wa anga hivyo amemuomba Sheikh Mohammed kuwahamasisha wafanyabiashara wa Qatar kushirikiana na Tanzania kuwekeza katika maeneo hayo.

Natambua kuwa Qatar mna utalaamu wa kuchakata gesi na sisi tunayo gesi nyingi, kwa hivyo nawakaribisha mje tushirikiane kuwekeza katika sekta ya gesi, na pia natambua kuwa nyie ni wanunuzi wakubwa wa dhahabu, sisi tunayo dhahabu nyingi na hivi sasa tumeanzisha vituo vya ununuzi wa dhahabu, nawakaribisha mje mnunue dhahabu na tutawapa ushirikiano wote mtaouhitaji” alisema Rais Magufuli.

Aidha, Rais Magufuli ameiomba Qatar kushirikiana na Serikali ya Tanzania katika utekelezaji wa miradi mikubwa ya maendeleo ikiwemo uzalishaji wa nishati ya umeme, ujenzi wa reli, barabara na madaraja na pia amemualika Mtawala wa Qatar, Sheikh Tamim bin Hamad Al Thani kufanya ziara Tanzania.

Kwa upande wake Naibu Waziri Mkuu wa Qatar, Sheikh Mohammed amemshukuru Rais Magufuli na Serikali yake kwa kuendelea kushirikiana na Qatar katika masuala mbalimbali na kubainisha kuwa Qatar inathamini uhusiano huo.

Sheikh Mohammed ameahidi kuwa Qatar ipo tayari kufanyia kazi maombi yaliyotolewa na Rais Magufuli na pia kuzileta kampuni za nchi hiyo kuja kuwekeza katika maeneo yenye fursa zenye manufaa kwa pande zote mbili.

Naye Waziri wa Mambo ya Nje na Ushirikiano wa Afrika Mashariki, Prof. Palamagamba Kabudi amesema baada ya kukutana na Rais Magufuli, yeye na Sheikh Mohammed watakua na mazungumzo ya kina kuhusu maeneo ya ushirikiano.

Mazungumzo ya viongozi hao yamehudhuriwa pia na Balozi wa Tanzania nchini Qatar, Fatma Rajab na Balozi wa Qatar nchini Tanzania, Abdullah Jassim Mohammed Al Medadi.

Latest News
TAHADHARI: Ujumbe wa kupewa mkopo ni wa kitapeli
Kutokana na kuwepo kwa ujumbe wa kitapeli unaosambazwa katika mtandao wa kijamii wa Whatsapp, Serikali imewataka wananchi wanaoupokea ujumbe huo kuupuuza wakati hatua kali zinachukuliwa juu ya wote waliohusika.
 
Kwa mujibu wa taarifa iliyotolewa na Idara ya Habari Maelezo, ujumbe huo unawataka wajasiriamali na wananchi wengine kutoa kiasi fulani cha fedha kwa nia ya kupewa mkopo kupitia taasisi iliyopewa jina la Kassim Majaliwa Foundation.
 
Inadaiwa kuwa katika ujumbe huo unawataka wahusika wanaoomba mkopo kutuma namba za vitambulisho vyao vya kupiga kura ili wapatiwe mkopo huo ndani ya saa 24.
 
Aidha taarifa hiyo imesisitiza na kuwataka wananchi kufahamu kuwa, Waziri mkuu, Kassim Majaliwa, hajasajili, hamiliki wala kuhusika na taasisi yoyote inayojihusisha na utoaji mikopo wala inayotumia jina hilo.
Maalum Seif Sharif Hamad ajiunga rasmi ACT WAZALENDO
Aliyekuwa Katibu Mkuu wa CUF, Maalim Seif Sharif Hamad, viongozi na wanachama wengine wanaomuunga mkono ndani ya chama hicho, wametangaza kujiunga na Chama cha ACT-Wazalendo.
 
Maalim Seif kupitia MCL Digital amesema, walichoamua leo ni kuandika historia mpya ya mabadiliko ya kisiasa kwa Tanzania Bara na Visiwani kwani Umma haujawahi kushindwa popote duniani.
 
Maalimu Seif amesema, wameamua kulitumia Jahazi la ACT WAZALENDO ili kuleta demokrasia, kusimamia haki, utu na ubinadamu na yenye neema inayowafikia watu wote na hawana wasiwasi kwamba watashinda.
 
Amemalizia kwa kusema, " wakati ni huu, wakati ni sasa, shusha tanga, pandisha tanga safari iendelee." alimalizia kiongozi huyo aliyetangaza rasmi kujiunga na ACT WAZALENDO na kuachana na CUF.
 
Kuhusu kwanini amefikia uamuzi huo wa kujiunga na  ACT WAZALENDO na si vyama vingine, Maalim Seif amesema kabla ya uamuzi huo walitembelea vyama vingine na kuhoji masharti waliyopewa na kuyachambua na kisha kuamua kujiunga na chama hicho ambacho kilikuwa na masharti mepesi
 
Kuhusu kunyang'anywa kwa mali za CUF, kiongozi huyo amesema hawana haja navyo na wameamua kusonga mbele huku akikiri kupoteza muda wake mwingi katika kukijenga chama hicho na kukanusha kuhusu shutuma za kukinunua Chama cha ACT WAZALENDO na kusema ni uzushi ulioanzishwa na waliofilisika kimawazo.
Makamu wa Rais awataka Wazanzibar kuilinda miundombinu iliyopo

Makamu wa Rais, Samia Suluhu Hassan amewataka wananchi kuendelea kuenzi miundombinu iliyosimamiwa na kutekelezwa chini ya uongozi wa Rais wa Zanzibar, Dkt. Ali Mohamed Shein.

Makamu wa Rais huyo amesema hayo wakati wa ufunguzi wa kongamano la Umoja wa Wanawake Tanzania (UWT) la kumpongeza Rais na Mwenyekiti wa Baraza la Mapinduzi Zanzibar, Dkt. Shein lililoratibiwa na umoja huo kwa upande wa Tanzania Bara na Visiwa.

Makamu wa Rais amewataka wananchi wa visiwani humo kuhakikisha wanasimamia na kuilinda miundombinu na maendeleo yaliyofikiwa chini ya uongozi wa Dkt. Shein ili iweze kudumu kwa maslahi ya wananchi wote na vizazi vijavyo.

Wakati huo huo, makamu wa Rais, amewataka wanawake kuhakikisha wanafanyakazi kwa bidii na kuzisemea kazi nzuri zinazofanywa na viongozi wa pande zote mbili ili wananchi wazijue na wasipotoshwe.

“Sisi ni sehemu muhimu sana ya utekelezaji wa ilani ya uchaguzi ya Chama Cha Mapinduzi, hivyo Kongamano hili liwe chachu yetu katika kuchapa kazi zaidi.

"Sote ni mashuhuda wa kazi kubwa na nzuri iliyofanyika hapa Zanzibar kwa kipindi cha miaka mitatu. Serikali ya Mapinduzi ya Zanzibar chini ya Uongozi mahiri wa Dokta Shein imefanya kila liwezekanalo kuboresha hali ya maisha ya wananchi wa Zanzibar kupitia miradi mbalimbali ya maendeleo katika sekta zote za kijamii, kisiasa na kiuchumi.”Alisisitiza Makamu wa Rais.

Profesa Lipumba amtangaza mrithi wa Maalim Seif Shariff Hamad

Mwenyekiti wa Chama cha Wananchi CUF, Profesa Ibrahim Lipumba amemtangaza Khalifa Suleiman Khalifa kuwa katibu mkuu wa chama hicho akichukua nafasi ya Maalim Seif Sharrif Hamad.

Mbali na Khalifa, Profesa Lipumba pia amemtangaza Mbunge wa Kaliua, Magdalena Sakaya kuwa Naibu Katibu mkuu Bara na Fakhi Suleiman Khatibu kuwa Naibu Katibu mkuu Zanzibar.

Profesa Lipumba amemtangaza Khalifa ambaye ni mbunge wa zamani wa Gando kuchukua nafasi ya Maalim Seif Sharif Hamad leo, Jumamosi baada ya kiongozi hao kushindwa kufikia muafaka wa kufanya kazi pamoja na hivyo kila upande kujigawa kwa kuwa na wafuasi wake.

Viongozi hao wamepatikana baada ya kuchaguliwa na Baraza Kuu la Uongozi lililokutana jana Ijumaa.

Hata hivyo, hatima ya viongozi hao wapya wa CUF akiwamo Profesa Lipumba aliyechaguliwa na mkutano mkuu Jumatano iliyopita Machi 14, 2019, itajulikana baada ya hukumu itakayotolewa Jumatatu ya Machi 18, 2019 na Mahakama Kuu ya Tanzania Kanda ya Dar es Salaam.

Hukumu hiyo ni ya kesi iliyofunguliwa na baadhi ya wanachana wa chama hicho upande wa Maalim Seif wakipinga uhalali wa Profesa Lipumba kuwa Mwenyekiti wa CUF.

Jimbo la Joshua Nasari latangazwa kuwa wazi

Spika wa Bunge la Jamhuri ya Muungana wa Tanzania, Job Ndugai amemuandika barua, Mwenyekiti wa Tume ya Taifa ya Uchaguzi (NEC), Semistocles Kaijage kuwa Jimbo la Arumeru Mashariki kwa sasa liko wazi kufuatia, Mbunge wake Joshua Nasari ( CHADEMA) kushindwa kuhudhuria mikutano mitatu mfululizo na hivyo kupoteza sifa za kuendelea kuwa mbunge.

Katika taarifa yake kwa vyombo vya habari, Spika Ndugai amesema, Mbunge Nasari hajahudhuria vikao hivyo vitatu mfululizo kikiwemo cha Mkutano wa kumi na kumi na mbili wa tarehe 4 -14 Septemba 2018 na mkutano wa kumi na tatu wa tarehe 6- 16 Novemba mwaka 2018.

Mkutano mwingine ambao Nasari anadaiwa hajahudhuria ni wa kumi nne wa tarehe 29 Januari  hadi Februari 9, 2019.

Kwa mujibu wa taarifa hiyo, uamuzi huo wa spika umezingatia masharti ya Katiba ya Jamhuri ya Muungano wa Tanzania, Ibara ya 71 (1) C ambayo inaeleza kuwa, “mbunge atakoma kuwa mbunge na ataacha kiti chake katika Bunge ikiwa atakosa kuhudhuria vikao vya mikutano vya Bunge mfulululizo bila ya ruhusa ya spika.”

Kanuni hiyo pia ikisaidiwa na ile ya 146 (1) na (2)  za Kanuni za Kudumu za Bunge toleo la Januari 2016. Kutokana na taarifa hiyo Tume ya Uchaguzi inaweza kuendelea na mchakato wa kupata Mbunge wa kujaza nafasi hiyo iliyo wazi katika Jimbo hilo la Arumeru Mashariki.