Bosi wa Airtel 'atinga' Ikulu jijini Dar es Salaam

|
Rais John Magufuli akijadiliana jambo na Mwenyekiti wa Kampuni ya Bharti Airtel, Sunil Mittal alipofika Ikulu jijini Dar es Salaam

Rais John Magufuli leo, Januari, 11 amekutana na Mwenyekiti wa Kampuni ya Bharti Airtel, Sunil Mittal, Ikulu Jijini Dar es Salaam ambapo walifanya mazungumzo kuhusu maendeleo ya majadiliano ya umiliki wa hisa za Kampuni hiyo ya Simu za mkononi ya Airtel Tanzania.

Baada ya mazungumzo hayo, Sunil Mittal amesema kampuni yake imekubali kuongeza hisa zinazomilikiwa na Serikali ya Tanzania katika kampuni ya Airtel Tanzania kutoka asilimia 40 hadi asilimia 49 na hivyo kupunguza hisa zilizokuwa zikimilikiwa na Bharti Airtel kutoka asilimia 60 hadi asilimia 51.

Sunil Mittal ameongeza kuwa mazungumzo kati ya kampuni yake na Serikali ya Tanzania yanakwenda vizuri na kwamba kampuni ya Bharti Airtel imeridhishwa na makubaliano yaliyofikiwa katika masuala yaliyokuwa yakijadiliwa yenye lengo la kuiimarisha Kampuni ya Airtel, kuleta manufaa kwa pande zote mbili na kuboresha huduma za mawasiliano za kampuni hiyo.

Kwa upande wake, Rais Magufuli amesema amefurahishwa na hatua iliyofikiwa katika mazungumzo hayo ambapo pamoja na kuongeza hisa za Serikali katika umiliki wa Airtel Tanzania, kampuni hiyo pia imekubali kutoa gawio kwa Serikali ya Tanzania mara baada ya mazungumzo hayo kukamilika hivi karibuni.

“Masuala mengine ya kumalizia mazungumzo haya yataendelea leo ili kumalizia, lakini jambo zuri ni kuwa sasa wamekubali kutoa gawio kwa Serikali ambapo kwa muda wa miaka minane hadi kumi tulikuwa hatujapata gawio, kiasi cha asilimia za gawio nacho watajadili leo, kwa hiyo mimi naona huu ni mwanga mzuri wa kwenda mbele kati ya kampuni ya Bharti Airtel na Serikali ya Tanzania pamoja na kampuni nyingine” amesema Rais Magufuli.

Timu hiyo ya majadiliano kwa upande wa Tanzania na kampuni ya Bharti Airtel inaongozwa na Waziri wa Katiba na Sheria Prof. Palamagamba Kabudi.

Utawala
Maoni