Test
Simiyu kuunusuru mkoa kuwa jangwa, waanza kupata miti

Mkoa wa Simiyu unatajwa kuwa na hali mbaya ya uoto kutokana na shughuli za kibinadamu ikiwemo kukata miti kwa ajili ya matumizi ya nishati ambapo imeelezwa kwamba kwa mwaka mzima mkoa huo huzalisha magunia ya mkaa 100 kwa makadirio ya chini  na kuni mita za ujazo 50.

Katika kukabiliana na hali hiyo taasisi ya Josephat Tonner imeanzisha Kampeni ya Simiyu ya kijani kwa kupanda miti maeneo ya wazi mkoani Simiyu.

Azam TV imeshuhudia kuanza kwa kampeni hiyo ikiwashirikiana vijana wa UVCCM Wilaya ya Bariadi ambao kwa pamoja na Taasisi ya Josephat Tonner imepanda miti 500 katika Mtaa wa Majengo wilayani humo.

Kaimu Meneja misitu wa wilaya hiyo ya Bariadi kutoka Wakala wa Huduma za Misitu Tanzania (TFS),  Abdul Mohamed amesema Serikali Ina kazi kubwa ya kuelimisha jamii juu upandaji miti ili kurudisha hali ya uoto mkoani humo.

Taasisi hiyo ya Josephat Torner ni taasisi inayotetea haki za watu wenye ulemavu wa ngozi, imesema imeamua kuanza kampeni hiyo lengo likiwa ni kulinda mazingira yanayoweza kuleta athari kwa wenye ualbino ambao hukumbana na tatizo kubwa la  ugonjwa wa saratani ya ngozi  hivyo uwepo wa miti mingi husaidia kuleta vivuli.

Dkt. Msonde atoa onyo kwa wadanganyifu wa mitihani ya Taifa

Katibu mtendaji wa Baraza la Taifa la Mitihani Tanzania (NECTA), Dkt. Charles Msonde ametoa onyo kwa shule zote na wanafunzi wote wa Kidato Cha Sita kutojihusisha na udanganyifu katika mtihani wa taifa unaotarajia kufanyika Mei 6, mwaka huu.

Katibu mkuu ameyasema hayo alipowatembelea wanafunzi zaidi ya 1000 wa kidato cha Sita mkoani Simiyu waliopo kwenye kambi ya kitaaluma katika Shule ya Sekondari ya Wasichana Maswa.

Akizungumza katika ziara yake hiyo, Dkt. Msonde ameupongeza Mkoa wa Simiyu kwa ubunifu uliofanya wa kuwakutanisha wanafunzi pamoja hali ambayo amesema inawawezesha kukabiliana na changamoto ya uhaba wa walimu hususani kwa masomo ya sayansi kwani kwa umoja huo walimu wachache waliopo wanaweza kuwafundisha wanafunzi wote.

Akitoa taarifa za kambi hiyo, Afisa Elimu Mkoa wa Simiyu, Ernest Hinju amesema Mkoa umeshuhudia mafanikio ya wanafunzi kukaa kambini kwa muda mfupi ambapo katika matokeo ya kitaifa ya kidato Cha Sita mwaka 2017, Mkoa ulishika nafasi ya mwisho na baada ya kuweka kambi za kitaaluma 2018 Mkoa ulipanda hadi nafasi ya 10.

Wanafunzi waliopo kambini kwa zaidi ya wiki tatu sasa wamesema wamejifunza mengi na kupata utayari wa kuukabili mtihani wa mwisho ifikapo Mei 6 huku wakiahidi kuupandisha Mkoa hadi nafasi ya tatu Bora kitaifa.

Zimbabwe kumaliza machungu ya mauaji ya miaka ya 1980

Rais Emmerson Mnangagwa wa Zimbabwe ameahidi kutekeleza uchimbuaji wa kaburi la pamoja la watu linaloaminiwa kutokana na mauaji yaliyotokea kwenye miaka ya 1980 wakati serikali ya kipindi hicho ilipokuwa ikitafuta watu waliokuwa wakiipinga.

Kati ya watu 5,000 na 20,000 wanaaminika kuuawa na vikosi vya usalama vya nchi hiyo vilivyokuwa chini ya utawala wa kiongozi wa zamani wa nchi hiyo Robert Mugabe huku mauaji hayo baadae yakija kufahamaika kwa jina la “Mauaji ya Gukurahundi”.

Miili ya watu hao inadaiwa kuwekwa chini ya igodi kabla ya kufukiwa kwenye makaburi ya pamoja.

Kwa mujibu wa BBC wananchi wengi wanaamini serikali ya nchi hiyo haijafanya jitihada ya kutosha kwa ajili ya kuzifikia familia za waathirika wa mauaji hayo.

Hadi sasa hakuna mashtaka yaliyosajiliwa wala tamko la kuomba radhi hadharani lililotolewa.

Serikali ya Mnangagwa imeahidi kutoa msaada wa matibabu kwa waathirika walio hai na kufanya mikutano ya hadhara na kumaliza unyanyasaji dhidi ya watu waozungumzia kwa uwazi waliyopitia kwenye nyakati hizo.

Inaaminika kuwwa hilo linaweza kumaliza uzoefu mbaya zaidi kwa nchi hiyo kuwahi kupitia tangu ilipopata uhuru.

Mwandishi Nanyaro azikwa kwao Arusha

Tume ya Taifa ya Uchaguzi (NEC) imeungana na familia, ndugu, jamaa na marafiki  kuuaga na kuuhifadhi kwenye makazi yake ya milele,  mwili wa mwandishi mwandamizi na wa siku nyingi na afisa wa NEC,  Clarence Nanyaro aliyefariki Aprili 2 mwaka huu na kuzikwa kijijini kwao Nkomaala, wilayani Meru mkoani Arusha.

Katika safari hiyo ya mwisho ya aliyekuwa kaimu mkuu wa sehemu ya Habari wa Idara ya Habari na Elimu ya Mpiga Kura kutoka Tume ya Uchaguzi iliongozwa na Mkurugenzi Ofisi ya Tume ya Taifa ya Uchaguzi (NEC) Zanzibar, Felix Wandwe aliyeambatana na watumishi kadhaa.

Akizungumza wakati akitoa salamu za rambirambi, Mkurugenzi Wandwe amesema Tume inaungana na familia, ndugu, jamaa na marafiki kuombeleza msiba wa mtumishi wake huyo kwani marehemu Nanyaro alikuwa mtu wa kuaminiwa kutokana na utendaji kazi wake mzuri.

Akitoa shukrani kwa niaba ya familia, Mkuu wa Boma Mzee Gadiel Nanyaro aliishukuru Tume ya Taifa ya Uchaguzi kwa walivyojitoa kwa familia.

Marehemu Nanyaro mbali na kufanya kazi Tume tangu mwaka 2015 hadi umauti unamkuta, pia alifanya kazi Wizara ya Ardhi, Nyumba na Maendeleo ya Makazi, Wizara ya Habari, Utamaduni na Michezo, Ofisi ya Makamu wa Rais, Muungano na Shirika la Utangazaji (TBC) katika nafasi mbalimbali.

Marehemu Nanyaro alifariki Aprili 2 baada ya kusumbuliwa na ugonjwa wa kisukari kabla ya kupatwa na ‘kisukari’ na kulazwa katika Hospitali ya Taifa ya Muhimbili kwa takribani siku 19 hadi umauti ilivyomkuta.

Marehemu ameacha mjane na watoto.

Waziri wa usalama wa ndani Marekani aachia ngazi

Waziri wa Usalama wa ndani wa Marekanii, Kirstjen Nielsen, ambaye pia alitekeleza baadhi ya sera zilizokuwa na utata za Rais Donald Trump amejiuzulu.

Mwanamama Nielsen katika taarifa yake ya kujiuzulu ameiita nafasi hiyo aliyopewa kuwa,  "ni heshima kubwa katika maisha yake" kufanyia kazi idara hiyo.

Katika ukurasa wake wa Twitter, Rais Trump ameandika kuwa, nafasi ya mwanamama huyo itazibwa kwa muda na Kamishna wa Ulinzi wa Mipaka na ushuru, Kevin McAleenan.

Nielsen atakumbukwa kwa kutekeleza bila kusita pendekezo la ujenzi wa ukuta mpakani mwa Marekani na Mexico pamoja na sera ya kutenganisha familia za wahamiaji nchini Marekani.

Katika barua yake ya kujiuzulu, waziri huyo hajatoa sababu zaidi za kwanini amefikia uamua huo ingawa amesisitiza kuwa “huu ni muda muafaka wa yeye kukaa pembeni" na kuongeza kuwa Marekani kwa sasa "iko salama leo zaidi ya wakati alipojiunga na utawala wa Trump".

Iran kuendelea kukabiliwa na mafuriko zaidi, wengi wahamishwa

Iran huenda ikakabiliwa na mafuriko makubwa yatakayoweza kusababisha watu wengi zaidi kuyahama makazi yao kutokana na utabiri kuonyesha kuwa mvua kubwa zaidi inatarajiwa kuendelea kunyesha mwishoni mwa wiki.

Dhoruba kubwa inatarajiwa katika eneo la majimbo ya kusini mwa Irani huku maafisa wa serikali wakitangaza hatua za tahadhari watakazochukua ikiwa ni pamoja na kuruhusu maji kutoka katika kingo za mito ili kupungza kiwango cha madhara ya kuvunjika kwa kingo za mito hiyo.

Wanawake na watoto wamehamishiwa katika maeneo salama huku wanaume wakitakiwa kushiri zoezi la uokozi.

Hadi sasa idadi ya watu waliokufa wamefikia 70, miji kama Susangerd wenye watu 50,000 utakuwa kwenye hatari zaidi na maafisa wamesema watu wanapaswa kuhama mji huo haraka.

Karibia Vijiji 70 watu wake wamehamishwa katika kipindi cha wiki moja iliyopita.

Makampuni ya Nishati katika maeneo yenye utajiri wa mafuta wametumia pampu zao kunyonya na kupunza maji katika maeneo yenye mafuriko.

Baba adaiwa kumbaka mtoto wake wa miaka minne

Mtoto mwenye umri wa miaka minne anadaiwa kubakwa na Baba yake Mzazi mwenye umri wa miaka 35 anayeishi  mtaa wa Nyankumbu Halmashauri ya Mji Geita.

Taarifa zinasema kuwa Baba huyo alikuwa akiishi na watoto wake wawili akiwemo huyo aliyedaiwa kumbaka  baada ya kuvunjika kwa ndoa yake na mama wa watoto hao.

Akisimulia tukio hilo, mama mzazi wa mtoto huyo amesema siku ya tukio hilo mume wake alimpigia simu kuwa mtoto wake wa kike anaumwa vipele sehemu za siri,hivyo alimtaka arudi nyumbani kwa ajili ya uangalizi wa mtoto na ndipo alipobaini kuwa mtoto huyo alifanyiwa unyama huo.

Mama wa mtoto huyo amesema chanzo cha kutofautiana hadi kutengana na mume wake huyo  ni kutokana na tabia ya ulevi  uliyopindukia. 

Kamanda wa Polisi mkoani Geita, MPONJOLI MWABULAMBO  amethibitisha kumshikilia baba wa mtoto huyo kwa tuhuma za ubakaji na kuwasihi wanawake kuwa karibu na watoto wao pale inapotokea tofauti na wenza wao.