Test
Simiyu kuunusuru mkoa kuwa jangwa, waanza kupata miti

Mkoa wa Simiyu unatajwa kuwa na hali mbaya ya uoto kutokana na shughuli za kibinadamu ikiwemo kukata miti kwa ajili ya matumizi ya nishati ambapo imeelezwa kwamba kwa mwaka mzima mkoa huo huzalisha magunia ya mkaa 100 kwa makadirio ya chini  na kuni mita za ujazo 50.

Katika kukabiliana na hali hiyo taasisi ya Josephat Tonner imeanzisha Kampeni ya Simiyu ya kijani kwa kupanda miti maeneo ya wazi mkoani Simiyu.

Azam TV imeshuhudia kuanza kwa kampeni hiyo ikiwashirikiana vijana wa UVCCM Wilaya ya Bariadi ambao kwa pamoja na Taasisi ya Josephat Tonner imepanda miti 500 katika Mtaa wa Majengo wilayani humo.

Kaimu Meneja misitu wa wilaya hiyo ya Bariadi kutoka Wakala wa Huduma za Misitu Tanzania (TFS),  Abdul Mohamed amesema Serikali Ina kazi kubwa ya kuelimisha jamii juu upandaji miti ili kurudisha hali ya uoto mkoani humo.

Taasisi hiyo ya Josephat Torner ni taasisi inayotetea haki za watu wenye ulemavu wa ngozi, imesema imeamua kuanza kampeni hiyo lengo likiwa ni kulinda mazingira yanayoweza kuleta athari kwa wenye ualbino ambao hukumbana na tatizo kubwa la  ugonjwa wa saratani ya ngozi  hivyo uwepo wa miti mingi husaidia kuleta vivuli.

Dkt. Msonde atoa onyo kwa wadanganyifu wa mitihani ya Taifa

Katibu mtendaji wa Baraza la Taifa la Mitihani Tanzania (NECTA), Dkt. Charles Msonde ametoa onyo kwa shule zote na wanafunzi wote wa Kidato Cha Sita kutojihusisha na udanganyifu katika mtihani wa taifa unaotarajia kufanyika Mei 6, mwaka huu.

Katibu mkuu ameyasema hayo alipowatembelea wanafunzi zaidi ya 1000 wa kidato cha Sita mkoani Simiyu waliopo kwenye kambi ya kitaaluma katika Shule ya Sekondari ya Wasichana Maswa.

Akizungumza katika ziara yake hiyo, Dkt. Msonde ameupongeza Mkoa wa Simiyu kwa ubunifu uliofanya wa kuwakutanisha wanafunzi pamoja hali ambayo amesema inawawezesha kukabiliana na changamoto ya uhaba wa walimu hususani kwa masomo ya sayansi kwani kwa umoja huo walimu wachache waliopo wanaweza kuwafundisha wanafunzi wote.

Akitoa taarifa za kambi hiyo, Afisa Elimu Mkoa wa Simiyu, Ernest Hinju amesema Mkoa umeshuhudia mafanikio ya wanafunzi kukaa kambini kwa muda mfupi ambapo katika matokeo ya kitaifa ya kidato Cha Sita mwaka 2017, Mkoa ulishika nafasi ya mwisho na baada ya kuweka kambi za kitaaluma 2018 Mkoa ulipanda hadi nafasi ya 10.

Wanafunzi waliopo kambini kwa zaidi ya wiki tatu sasa wamesema wamejifunza mengi na kupata utayari wa kuukabili mtihani wa mwisho ifikapo Mei 6 huku wakiahidi kuupandisha Mkoa hadi nafasi ya tatu Bora kitaifa.

Mwandishi Nanyaro azikwa kwao Arusha

Tume ya Taifa ya Uchaguzi (NEC) imeungana na familia, ndugu, jamaa na marafiki  kuuaga na kuuhifadhi kwenye makazi yake ya milele,  mwili wa mwandishi mwandamizi na wa siku nyingi na afisa wa NEC,  Clarence Nanyaro aliyefariki Aprili 2 mwaka huu na kuzikwa kijijini kwao Nkomaala, wilayani Meru mkoani Arusha.

Katika safari hiyo ya mwisho ya aliyekuwa kaimu mkuu wa sehemu ya Habari wa Idara ya Habari na Elimu ya Mpiga Kura kutoka Tume ya Uchaguzi iliongozwa na Mkurugenzi Ofisi ya Tume ya Taifa ya Uchaguzi (NEC) Zanzibar, Felix Wandwe aliyeambatana na watumishi kadhaa.

Akizungumza wakati akitoa salamu za rambirambi, Mkurugenzi Wandwe amesema Tume inaungana na familia, ndugu, jamaa na marafiki kuombeleza msiba wa mtumishi wake huyo kwani marehemu Nanyaro alikuwa mtu wa kuaminiwa kutokana na utendaji kazi wake mzuri.

Akitoa shukrani kwa niaba ya familia, Mkuu wa Boma Mzee Gadiel Nanyaro aliishukuru Tume ya Taifa ya Uchaguzi kwa walivyojitoa kwa familia.

Marehemu Nanyaro mbali na kufanya kazi Tume tangu mwaka 2015 hadi umauti unamkuta, pia alifanya kazi Wizara ya Ardhi, Nyumba na Maendeleo ya Makazi, Wizara ya Habari, Utamaduni na Michezo, Ofisi ya Makamu wa Rais, Muungano na Shirika la Utangazaji (TBC) katika nafasi mbalimbali.

Marehemu Nanyaro alifariki Aprili 2 baada ya kusumbuliwa na ugonjwa wa kisukari kabla ya kupatwa na ‘kisukari’ na kulazwa katika Hospitali ya Taifa ya Muhimbili kwa takribani siku 19 hadi umauti ilivyomkuta.

Marehemu ameacha mjane na watoto.

Baba adaiwa kumbaka mtoto wake wa miaka minne

Mtoto mwenye umri wa miaka minne anadaiwa kubakwa na Baba yake Mzazi mwenye umri wa miaka 35 anayeishi  mtaa wa Nyankumbu Halmashauri ya Mji Geita.

Taarifa zinasema kuwa Baba huyo alikuwa akiishi na watoto wake wawili akiwemo huyo aliyedaiwa kumbaka  baada ya kuvunjika kwa ndoa yake na mama wa watoto hao.

Akisimulia tukio hilo, mama mzazi wa mtoto huyo amesema siku ya tukio hilo mume wake alimpigia simu kuwa mtoto wake wa kike anaumwa vipele sehemu za siri,hivyo alimtaka arudi nyumbani kwa ajili ya uangalizi wa mtoto na ndipo alipobaini kuwa mtoto huyo alifanyiwa unyama huo.

Mama wa mtoto huyo amesema chanzo cha kutofautiana hadi kutengana na mume wake huyo  ni kutokana na tabia ya ulevi  uliyopindukia. 

Kamanda wa Polisi mkoani Geita, MPONJOLI MWABULAMBO  amethibitisha kumshikilia baba wa mtoto huyo kwa tuhuma za ubakaji na kuwasihi wanawake kuwa karibu na watoto wao pale inapotokea tofauti na wenza wao.

JPM: Nchi isyo na umeme wa uhakika kupata maendeleo ni ndoto

Rais Magufuli amesema, nchi isiyokuwa na umeme nafuu na wa uhakika na usiojitosheleza kupata maendeleo ni ndoto.

Rais Magufuli ameyasema hayo wakati akizungumza na umma wa wananchi wa mkoani Ruvuma alipokuwa akizundua mradi wa kusafirisha umeme kutoka Makambako hadi Songea wenye jumla ya kilovotts 220.

Akizungumzia umuhimu wa kuwepo kwa upatikanaji wa umeme wa kutosha na uhakika Rais Magufuli amesema idadi ya watu imekuwa ikiongezeka tangu uhuru huku hali ya umeme ikiwa haitoshelezi.

Amesema, Tanzania imeamua kuingia katika uchumi wa viwanda na ili kuwezesha hilo ni lazima umeme uwe wa uhakika ambao utasaidia uzalishaji bidhaa zitakazouzwa kwa bei nafuu sanjari na kuongeza ajira.

“ Huwezi kuwa na viwanda unategemea umeme wa dizeli, hivyo huwezi kushindana na viwanda vya nchi zinazoendelea ambazo umeme wao ni wa uhakika na viwanda vyao vitazalisha bidhaa na kuziuza kwa bei nafuu na hivyo sisi tutaendelea kuwa wazalishaji wa malighafi na kushindwa kuzalisha ajira.” Alisema Rais Magufuli.

Rais Magufuli amesema, miradi inayoendelea kuzalisha umeme nchi hadi sasa imeshaokoa takribani shilingi bilioni 217 kutoka uzalishaji wa umeme wa kutumia mitambo na mafuta.

Akizungumzia athari za kukosekana kwa umeme wa uhakika, Rais Magufuli amesema tatizo hilo limepelekea nchi ya Tanzania kupoteza takribani hekta 400,000 kila mwaka kwaajili ya wananchi kutafuta mkaa na kuni sanajri na kuharibu mazingira.

Amesema mbali na hilo pia kwa mujibu wa Benki ya MAENDELEO YA AFRIKA imeitaja Tanzania kupoteza maisha ya watu takribani 600,000 kwa mwaka kutokana na ajali na maradhi mbalimbali yanayotokana na matumizi ya nishati mbadala kama kuni, mafuta na mengine.

Aidha Rais Magufuli amemtaka Balozi wa Sweden nchini kuwaeleza wadau wenzake wa maendeleo kuwa Tanzania ni miongoni mwa nchi inayolinda mazingira yake kwa kiwango cha juu.

"Tanzania inajali sana utunzaji wa ardhi na uhifadhi, hivyo tunapotumia sehemu ndogo kwa ajili ya matumizi ya umeme ili kuwakwamua wananchi wetu tunaomba mtuelewe, msituzuie bali mtuunge mkono." Alisema Rais Magufuli.

Aidha amesema, hakuna Taifa lisilopenda kuona watu wake wanajikwamua na ugumu wa maisha na kumtaka Balozi huyo wa Sweden ambaye nchi yake imechangia katika mradi huo kuendelea kuiunga mkono Tanzania kwani dhamira ya serikali ni kuona wananchi wanapunguziwa ukali wa maisha kwa kuwa na umeme wa kutosha na uhakika.

“Nimefurahi kumuona balozi wa Sweden hapa ili aone kuwa fedha zinazotolewa zinatumika ipasavyo hakuna rushwa kwani azma na dhamira ya serikali ni kuifanya nchi yetu kuwa na umeme wa kutosha na wa bei nafuu,”

Rais Magufuli amewataka pia TANESCO kuutunza mradi huo kwa kuwa ni MALI YA UMMA na kuwataka wananchi kutunza vyanzo vya maji na misitu na kuwataka kuacha tabia ya uvamizi wa mazingira na kukata miti hovyo.

"Niwaombe wananchi, msivamie maeneo na msiingie misitu. Unakuta yuko katikati ya pori halafu anasema tunaomba mtulindie mazao yetu wakati umewaingilia wanyama pori. Tuitunze misitu, msikate miti. Mkiharibu mazingira yatatuadhibu." alisema Rais Magufuli.

Magufuli aagiza mamilioni kujenga vituo vya afya Ruvuma

Rais John Magufuli amemuagiza Waziri wa TAMISEMI, Selemani Jafo kutoa shilingi milioni 200 za kukamilisha ujenzi na upanuzi wa  Kituo cha Afya cha Juma Homera kilichopo Nakayaya wilayani Tunduru mkoani Ruvuma.

Maagizo hayo ameyatoa alipohutubia wananchi wa wilaya hiyo katika mkutano wa hadhara uliofanyika kwenye Viwanja vya soko la Mchele –Nakayaya akiwa katika ziara yake ya kikazi mkoani Ruvuma.

Rais Magufuli amefikia uamuzi huo baada ya kuguswa na michango ya wananchi waliotoa katika kuchangia ujenzi wa kituo hicho cha afya Juma Homera ya shilingi milioni 189 ili kujenga kituo hicho kitakachosaidia kupunguza msongamano wa wagonjwa katika hospitali ya Wilaya ya Tunduru.

“Waziri wa TAMISEMI nakuagiza ulete shilingi milioni 200 kwa ajili ya kufanya upanuzi wa kituo cha afya Juma Homera ili kitoe huduma za upasuaji, mionzi, kuongeza wodi za kutosha ili kurahisha huduma za afya kwa wananchi wa Tunduru” alisema Rais Magufuli.

Katika hatua nyingine,  Rais Magufuli amemuagiza waziri Jafo kutoa shilingi milioni 500 za ujenzi wa kituo cha afya katika Kata ya Namiungo ambayo haina zahanati wala kituo cha Afya katika  vijiji saba vya kata hiyo.

Magufuli alitoa agizo hilo baada ya kulazimika kusimamisha msafara wake na kusikiliza malalamiko ya wananchi waliokuwa wamefunga barabara ambapo aliwahakikishia kuwa hakuna sababu ya kata hiyo kukosa kuwa na kituo bora na cha kisasa ili kupunguza vifo vya kinamama na wajawazito na watoto vinavyosababishwa na kusafiri umbali mrefu kufuata huduma za afya.

Rais Magufuli pia aliwataka wananchi kufanya kazi na kushikamana katika kuijenga Tunduru na kuepuka chuki za kisiasa kwani  maendeleo hayana chama, niwatake wanatunduru muungane kwa pamoja katika kuleta maendeleo chanya.

Rais Magufuli afanya uteuzi Wizara ya Fedha, TRA

Rais Magufuli amemteua Adolf Hyasinth Mohondela Ndunguru kuwa Naibu Katibu Mkuu wa Wizara ya Fedha na Mipango anayeshughulikia Sera.

Ndunguru ameteuliwa kushika nafasi ya Naibu  Katibu Mkuu wa Wizara ya Fedha na Mipango (Sera) ambayo ilikuwa wazi.

Kabla ya uteuzi huo, Ndunguru alikuwa Naibu Kamishna Mkuu wa Mamlaka ya Mapato Tanzania (TRA).

Kufuatia Uteuzi huo, Rais Magufuli amemteua Msafiri Lameck Mbibo kuwa Naibu Kamishna Mkuu wa TRA.

Kabla ya Uteuzi huo, Mbibo alikuwa Meneja wa TRA Mkoa wa Kilimanjaro.

Uteuzi wa viongozi hao unaanza mara moja leo tarehe 31 Machi, 2019.