PM: Ridhieni mkataba wa kuanzishwa kamisheni ya Mto Nile

|
Waziri Mkuu Kassim Majaliwa akizungumza na wajumbe wa Mkutano wa Mawaziri wa Bonde la Mto Nile jijini Dar es Salaam

Waziri mkuu, Kasimu Majaliwa amezitaka nchini wanachama kuridhia mkataba kwa kuanzishwa Kamisheni ya Bonde la Mtoni Nile kwa haraka ili chombo hicho  kiweze kufuatilia na kusimamia miradi ambayo wamekubaliana ambayo inatarajiwa kuleta manufaa kwa nchi wananchama.

Waziri mkuu Kasimu Majaliwa ameyasema hayo jijini Dar es Salaam wakati wa ufunguzi wa Mkutano wa 21 wa Baraza la Mawaziri wa Nchi za Bonde la Mto Nile ambapo pamoja na mambo mengine amesema kuwa nchi wanachama zinapaswa kuongeza utashi wa kisiasa katika kutekeleza malengo yake.

Ameyasema hayo leo, Alhamisi, Novemba 22, jijini Dar es Salaam kwa niaba ya Rais Dkt. John Magufuli.

Amesema nchi wanachama hazina budi kuimarisha ushirikiano ili ziweze kusimamia vizuri matumizi endelevu ya maji ya Mto Nile pamoja na kushughulikia changamoto zinazolikabili Bonde la Mto Nile.

Waziri Mkuu ametaja baadhi ya changamoto zinazolikabili Bonde la Mto Nile kuwa ni pamoja na kushindwa kufikia makubaliano ya kuanzisha Kamisheni ya Kudumu ya Bonde la Mto Nile. “Kwa takribani miaka 10 sasa tumeshindwa kufikia makubaliano.”

Amesema, sambamba na changamoto hiyo nchi wanachama zimekuwa zikichelewa mno kutoa michango yao ili kuziwezesha taasisi zao kutekeleza ipasavyo majukumu yao, jambo ambalo si tu linachelewesha maendeleo bali linatishia usalama wa maji katika Bonde la Mto Nile.

Kufuatia hali hiyo, Waziri Mkuu ametoa mapendekezo mbalimbali ili kuhakikisha kunakuwa na matumizi endelevu ya rasilimali za maji kwenye Bonde la Mto Nile pamoja na kusaidia nchi wanachama kupata maendeleo.

Moja ya mapendekezo yaliyotolewa ni pamoja na nchi wanachama kutoa elimu kwa wananchi wake kuhusu matumizi sahihi ya maji na umuhimu wa kutunza vyanzo vyake ili kuhakikisha kunakuwepo na matumizi endelevu ya maji.

“Suala jingine ni ulipaji wa michango. Taasisi zetu haziwezi kutekeleza majukumu yake kama hatulipi michango tena kwa wakati maana miradi ya maendeleo haiwezi kutekelezwa kwa haraka kwa kutegemea wafadhili. Ni vema nchi zikalipa michango.”

Waziri Mkuu amesema maji ni rasilimali muhimu duniani kwaajili ya uhai wa binadamu, maendeleo ya kiuchumi na kijamii hususani katika kuendesha shughuli za kilimo, uvuvi, ufugaji, utalii na ujenzi, hivyo lazima vyanzo vitunzwe.

Amesema Bara la Afrika ni miongoni mwa maeneo yanayokabiliwa na matatizo makubwa ya maji duniani, ambapo takwimu zinaonesha kuwa takribani nchi 14 hivi sasa zinakabiliwa na uhaba ama upungufu wa maji huku nyingine 11 zikitarajiwa kuingia katika kundi hilo ifikapo 2025.

Waziri Mkuu amesema kutokana na hali hiyo mikakati ya makusudi inahitajika ili kuhakikisha chanzo hicho cha maji kinalindwa na rasilimali ya maji katika Bonde la Mto Nile inatumika vizuri.

Mkutano huo umehudhuriwa na Waziri wa Maji, Profesa Makame Mbarawa ambaye ndiye Mwenyekiti wa Baraza la Mawaziri wa Nchi za Bonde la Mto Nile zilizopo kwenye Ukanda wa Maziwa Makuu, Waziri wa Mambo ya Nje na Ushirikiano wa Afrika Mashariki, Balozi Augustine Mahiga na Waziri wa Nishati Dkt. Medard Kalemani.

Wengine ni Naibu Waziri wa Maji, Jumaa Awesu, Mabalozi wanaoziwakilisha nchi zao nchini, watendaji wa Sekretarieti ya Bonde la Mto Nile kutoka Ukanda wa Maziwa Makuu pamoja na Ukanda wa Mashariki na maafisa wengine wa Serikali.

Maji
Maoni