Test
Ghala ya Tume ya Uchaguzi DR Congo lateketea

Moto umezuka katika jengo la Tume ya Uchaguzi nchini Jamhuri ya Kidemokrasi ya Congo, zikiwa zimesalia siku kumi kabla ya kufanyika uchaguzi wa Rais ambao kampeni zake zimegubikwa na vurugu.

Tume ya uchaguzi CENI imethibitisha kutokea kwa moto huo na uchunguzi wa tukio hilo bado unaendelea huku ikiwatoa hofu Wakongo juu ya uchaguzi huo.

Moto huo umezuka baada ya watu kuuawa Jumatano katika mapigano na polisi kando mwa mkutano wa hadhara wa upinzani mashariki mwa Congo.

Mapigano yalizuka katika mji wa Kalemie, wa ziwa Tanganyika ambako mgombea urais wa upinzani Martin Fayulu alikuwa akiendesha kampeni zake.

Mkuu wa tume hiyo ya uchaguzi, CENI amesema moto huo umezuka majira ya saa nane usiku wa manane katika ghala ambalo vifaa vya uchaguzi vimehifadhiwa.

Naye mmoja wa shuhuda wa tukio hilo Amy Gaylor akisimulia amesema, moto huo ulitokea majira ya usiku wa manane katika stoo kubwa ya Tume hiyo Huru ya Taifa ya Uchaguzi.

"Wakati huo ndiyo tulipoviita vyombo vinavyohusika ambao walikuja kuulizia hali ilivyokuwa. Kwa kweli hatujui nini hasa chanzo cha moto huu. "

Moshi mzito mweusi umeonekana katika anga la jiji la Kinshasa mapema leo asubuhi huku  

Chanzo cha moto huo kikiwa hakijafahamika mara moja na Tume imeatangaza kuanza kwa uchunguzi na kwamba uchaguzi huo utafanyika kama ulivyopangwa.

Burundi yamnyoshea kidole Rwanda, yataka mkutano maalumu wa usuluhishi

Rais wa Burundi, Pierre Nkurunziza amesema kuna mzozo wa wazi kati ya taifa lake na taifa jirani la Rwanda katika kinachoonekana kuwa kudorora zaidi kwa uhusiano baina ya mataifa hayo mawili.

Rwanda na Burundi zimekuwa na uhasama kwa muda sasa huku Burundi ikiituhumu Rwanda kwa kuhusika katika jaribio la kupindua Serikali yake mwaka 2015 ambalo lilishindwa.

Kwa mujibu wa BBC, Burundi imedai kwamba Rwanda iliwafadhili waliohusika na jaribio hilo na kwamba inatoa hifadhi kwao.

Hata hivyo Rwanda yenyewe mara kwa mara imekuwa ikikanusha tuhuma hizo.

Kwa mujibu wa vyonzo vya uhakika, Rais Pierre Nkurunziza amemwandikia barua Mwenyekiti wa Jumuiya ya Afrika Mashariki, Yoweri Museveni ambaye ni Rais wa Uganda akimtuhumu Rwanda kama adui ndani ya Jumuiya ya Afrika Mashariki.

"Rwanda ndiyo nchi pekee katika ukanda huu ambaye ni mmoja wa wahusika wakuu katika kuvuruga uthabiti wa taifa langu na kwa hivyo siichukulii kama taifa mshirika, lakini kama adui wa nchi yangu," ilisema sehemu ya barua hiyo ambayo imeonesha kutiwa saini na Nkurunziza Desemba 4.

Kiongozi huyo ametaka uitishwe Mkutano maalum wa EAC kwaajili ya kujadili mzozo huo kati ya Rwanda na Burundi.

Viongozi wa mataifa ya jumuiya hiyo ambayo kwa sasa inajumuisha nchi za Burundi, Rwanda, Uganda, Kenya, Tanzania na Sudan Kusini wamepanga kukutana Desemba 27 baada ya kushindwa kukutana mwishoni mwa juma lililopita kufuata Burundi kutoshiriki na kusababisha akidi kutotimia.

Mahakama Zambia yamsafishia njia Rais Lungu 2021

Mahakama ya Kikatiba ya Zambia imesema Rais wa sasa wa nchi hiyo, Edgar Lungu anazo sifa za kuwania nafasi hiyo tena katika uchaguzi mkuu unaotarajiwa kufanyika mwaka 2021.

Uamuzi huo wa Mahakama umetangazwa leo, Ijumaa na hivyo kutupilia mbali hoja ya wapinzani waliotaka Lungu asiwanie tena urais wakidai tayari ameshahudumu kwa awamu mbili kwa mujibu wa Katiba.

Wafuasi wa Chama cha Patriotic Front cha Rais, Edgar Lungu walifika mahakamani hapo wakiwa na shauku ya kutaka kujua uamuzi wa Mahakama hiyo mjini Lusaka.

Hata hivyo wengi wao walikuwa wamejawa na furaha tayari tangu awali kabla ya uamuzi huo kutolewa na  kunogeshwa zaidi na waliokuwa ndani ya Mahakama baada ya hukumu hiyo.

"Mahakama ya Kikatiba imeliweka vyema suala hili, imesema Rais Edgar Lungu anazo sifa za kuwania mwaka 2021."

"Hoja ilikuwa ni kwamba je vipindi viwili alivyovitumikia vinakamilisha awamu mbili za uongozi wake kwa mujibu wa Katiba? Jibu la Mahakama ni kwamba, si kweli."

Lakini ni nini kimetokea nchini Zambia?

Mwaka 2014 mwezi Oktoba Zambia ilimpoteza Rais wake wa Tano marehemu, Michael Charles Chilufya Sata aliyekuwa ameiongoza nchi hiyo kwa awamu moja kuanzia mwezi Septemba mwaka 2011.

Kutokana na kifo hicho uliitishwa uchaguzi wa mwezi Januari mwaka 2015 ambapo Edgar Lungu alishinda na kuhudumu kwa mwaka mmoja na nusu kabla ya uchaguzi mkuu wa mwezi Agosti mwaka 2016 ambapo alishinda tena na kuwa madarakani mpaka sasa.

Mwaka jana Lungu alitangaza rasmi kuwania uchaguzi wa mwaka 2021 na ndipo baadhi ya vyama upinzani na chama cha wanasheria wakaenda kwenye mahakama ya Katiba wakimpinga kwa hoja kuwa Rais huyo anavunja Katiba kwa kuwania awamu ya tatu.

Jaji wa Mahakama ya Katiba, Hildah Chibomba amesema urais wa awali wa Lungu wa mwaka mmoja na nusu hauwezi kuhesabiwa kuwa ni awamu iliyotimia.

Jiji la Dar es Salaam sasa kuongozwa na manaibu meya wawili

Hatimaye Jiji la Dar es Salaam, limefanikiwa kupata manaibu Meya wawili baada ya wagombea wawili kugongana kwa kupata kura 12/12.

Wawili hao waliogongana kura hizo baada ya kurudiwa mara kadhaa ni pamoja na mgombea wa CCM, Mariam Lulida, Diwani wa Kata ya Mchafukoge na Ally Harubu wa Kata ya Makumbusho kwa tiketi ya Chama cha CUF, ambao kutokana na kufungana huko, sasa wataongoza kwa kupokezana kwa miezi mitatu mitatu kuanzia Disemba 30.

Uchaguzi huo umefanyika katika ukumbi wa Karimjee, jijini Dar es Salaam na hii ikiwa ni mara ya kwanza kwa mkutano huo kufikia uamuzi huo na wawili hao wanachukua nafasi ya Mussa Kafana aliyekuwa Diwani wa Kata ya Kilawi CUF.

Marekebisho sheria ya vyama vya siasa 'mtihani' kwa watakaoungana

Vyama vya Siasa Nchini huenda vikalazimika kufa iwapo viongozi wake na wanachama wao watahitaji kutengeneza muungano kuelekea kwenye chaguzi na hivyo kutakiwa kuunda Chama kipya ambacho kitapata usajili kulingana na mkataba wa makubaliano watakaofikia.

Haya ni sehemu ya matakwa ya Marekebisho ya Sheria ya Vyama vya Siasa ya mwaka 2018 kupitia muswada wake uliowasilishwa Bungeni mwezi Novemba mwaka huu ambapo sasa hakutakuwa na uhuru wa vyama kuungana kiholela badala yake kwa kufuata masharti ya kisheria.

Hayo yamebainika leo, Alhamisi katika mahojiano maalumu kati ya Msajili Msaidizi wa Vyama Vya Siasa Nchini, Sisty Nyahoza na Azam TV waliotaka kufahamu faida na adhari zinazoweza kujitokeza kufuatia sheria hiyo.

Akitolea ufafanuzi suala hilo lililotokana na hofu ya kuwa sheria hiyo inaweza kuua upinzani na kurudisha mfumo wa Chama kimoja, Msajili msaidizi huyo amesema marekebisho yaliyofanyika yana nia njema ya kuviimarisha vyama vya upinzani na kukanusha madai ya kwamba yanalenga kuua mfumo wa vyama vingi nchini kama ambavyo imekuwa ikidaiwa.

Mahakama Kuu Kigali yawaachia huru Diana Rwigara na mama yake

Mahakama Kuu mjini Kigali imewaachilia huru mwanasiasa wa upinzani Diane Rwigara na mama yake waliokuwa wakikabiliwa na kesi ya uchochezi pamoja na kughushi nyaraka.

Jaji wa Mahakama Kuu mjini Kigali ametangaza uamuzi huo baada ya kukutwa hawana hatia.

 

Wawili hao walikuwa kizuizini tangu mwaka jana kwa tuhuma za kuchochea vurugu na kuligawa taifa miongoni mwa wananchi pamoja na kughushi nyaraka za serikali wakati wa kinyang’anyiro cha uchaguzi wa Urais mwaka jana.

Wawili hao wakati wote wamekuwa wakikanusha kuhusu mashtaka hayo na kudai kuwa kesi yao hiyo inachochewa na sababu za kisiasa.

Kesi ya kina Mbowe yaahirishwa tena Kisutu

Mahakama ya Hakimu Mkazi Kisutu, imeahirisha kesi inayowakabili viongozi wa CHADEMA, hadi Disemba 21 kwaajili ya kutajwa wakati ikisubiri uamuzi wa Mahakama ya Rufaa iliyokatwa na upande wa mashtaka kupinga usikilizwaji wa rufaa ya Mwenyekiti wa chama hicho, Freeman Mbowe na Mbunge wa Ester Matiko.

Aidha Hakimu Mkazi Mkuu wa mahakama hiyo, Wilbard Mashauri ameridhia taarifa ya kutofika mahakama kwa Mbunge wa Kawe, Halima Mdee na Mbunge wa Tarime Vijijini, John Heche ambao wako nchini Burundi wakishiriki michuano ya mabunge ya Afrika Mashariki.

Hakimu mkazi huyo na upande wa mashtaka wamesema hawana pingamizi juu ya uwepo wa taarifa za uzuru huo kutokana na kupokea nakala za barua za ruhusa kutokana Bungeni.

Katika Kesi hiyo iliyotajwa leo  Disemba 6, Mbowe na viongozi wakuu wa Chadema hicho, wanakabiliwa na mashtaka 13 ya uchochezi, uasi na kuhamasisha wafuasi wao kutenda makosa pamoja kufanya mkusanyiko kinyume na Sheria za nchi.

Taarifa ya kutofika mahakamani hapo kwa Mbunge Mdee iliwasilishwa pia na mdhamini wake, Farws Robson aliyeieleza mahakama kuwa mbunge huyo hakuweza kufika kwa kuwa yuko Burundi kwa safari ya kibunge akishiriki michezo ya wabunge wanawake wa mabunge ya Afrika Mashariki.

Robson ameieleza mahakama kuwa Katibu wa Bunge alimwandikia barua Hakimu Mfawidhi wa Mahakama ya Kisutu kuhusiana na safari ya Mdee na kwamba anatarajia kurejea nchini Desemba 20, 2018.

Akitoa uamuzi wa mahakama baada ya kusikiliza hoja hizo, Hakimu Wilbard Mashauri amesema kwa kuwa alipokea nakala ya barua ya Bunge ikimwombea ruhusa Mdee  amekubali aendelee na shughuli zake hizo, wakati kwa upande wa Heche amesema anamruhusu aendelee na ruhusa yake ya kumuuguza mkewe ambayo alishampatia.

Hata hivyo amewataka washtakiwa wote wawepo tarehe hiyo 21 kesi hiyo itakapotajwa.

Wanaoshtakiwa katika kesi hiyo ni pamoja na Mwenyekiti Freeman Mbowe, Mbunge wa Kawe, Halima Mdee, Mbunge wa Tarime vijijini, John Heche, Katibu Mkuu wa CHADEMA, Dkt. Vicent Mashinji; Naibu katibu wakuu wa Bara, John Mnyika  na Salum Mwalimu  wa Zanzibar pamoja na mbunge wa Iringa Mjini, Mchungaji Peter Msigwa.

Wengine ni mweka hazina wa Baraza la Wanawake la chama hicho (Bawacha), Esther Matiko na Mbunge wa Bunda, Ester Bulaya.

Wanadaiwa kutenda makosa hayo Februari 16, 2018 katika viwanja vya Buibui wilayani Kinondoni wakati wakihutubia katika mkutano wa hadhara wa kampeni za uchaguzi mdogo wa ubunge katika Jimbo la Kinondoni.