Test
Theresa May akwaa kisiki kwa wenzake Ulaya

Viongozi wa Umoja wa Ulaya (EU) wamemwambia Waziri Mkuu wa Uingereza, Theresa May kuwa mapendekezo yake ya kumsaidia kusukuma mbele mchakato wa kuachana na umoja huo kwa lengo la kuwashawishi wananchi wa Uingereza kuunga mkono, hayajawekwa wazi kiasi cha kumsaidia kwa sasa.

Badala yake viongozi hao 27 wamesema wataendelea kuitafakari mipango hiyo kuelekea Machi 29 mwakani ambapo hatua watakazozichukua viongozi hao zitawasilishwa wiki ijayo.

Hayo yamebainika leo wakatika viongozi wa nchi 27 wanachama wa EU walipokutana na Waziri mkuu wa Uingereza, Theresa May ambaye baada ya kunusurika kura ya kutokuwa na imani na uongozi wake kutoka kwa wabunge wa Chama chake cha Conservative, akaamua kwenda kuonana na viongozi wenzake wa EU ili kuhakikishiwa juu ya masuala yenye utata katika muswada wa Mkataba wa Brexit ili aweze kuwashawishi wananchi wa Uingereza kuunga mkono mpango huo.

Wamesema wanasita kusema kwamba hakutakuwa na mabadiliko ya maana katika mkataba wa kisheria unaoihusu Uingereza kuachana na Umoja wa Ulaya na kusema kuwa mkataba huo hauruhusu majadiliano mapya.

Mpango wa Brexit una wakosoaji wengi lakini suala moja ambalo halibadiliki, ni suala la udhibiti wa mpaka lililowekwa kisheria kati ya Ireland Kaskazini ambayo ni sehemu ya Uingereza na Ireland ambayo ni mwanachama wa EU.

May 'ahaha' kuungwa mkono EU mpango wa BREXIT

Waziri Mkuu wa Uingereza, Theresa May amekuwa na mfululizo wa mikutano na baadhi ya viongozi wa nchi za Ulaya na maafisa wa Umoja wa Ulaya (EU) kwaajili ya mazungumzo yenye lengo la kuokoa mpango wake wa Uingereza kujitoa katika umoja huo maarufu kama Brexit.

May amekutana leo, Jumanne na Waziri Mkuu wa Uholanzi, Mark Rutte na baadaye Angela Merkel wa Ujerumani baada ya kuahirishwa upigaji kura katika Bunge dogo la Uingereza kuhusu mpango huo wa Brexit.

May amesema anahitaji "uthibitisho zaidi" kuhusu Mpango wa Mpaka wa Ireland ya Kaskazini ili kupata uungwaji mkono kutoka kwa wabunge.

Rais wa Baraza la Ulaya, Donald Tusk amesisitiza kuwa EU haitabadili maamuzi yake ya kuridhia Uingereza kujiondoa katika Umoja wa Ulaya, lakini amesema viongozi wake wako tayari kujadili zaidi jinsi ya kuisaidia Uingereza kuhusu mpaka wake wa Ireland ya Kaskazini.

Ireland ya Kaskazini ambayo ni sehemu ya Uingereza hawakubaliani na Brexit, jambo ambalo linaleta mkwamo kwa Theresa May. 

Walaumiwa kwa 'kukacha' mkutano wa hali ya uhamiaji duniani

Rais wa Shirikisho la Kimataifa la Msalaba Mwekundu (IFRC) amewalaumu baadhi ya viongozi duniani kwa kutohudhuria Mkutano wa Kimataifa wa siku mbili kuhusu "Hali tete ya Uhamiaji duniani " unaofanyika huko Marrakech nchini Morocco.

Nchi zaidi ya 160 zimekubaliana juu ya Mkataba wa Umoja wa Mataifa wa Uhamiaji unaowahakikishia usalama na uhuru wa kuhama kutoka nchi moja kwenda nyingine, kinyume na msimamo wa nchi kama Marekani na nchi nyingine kadhaa.

Mapema jana baadhi ya wajumbe akiwemo Kansela wa Ujerumani, Angela Merkel wameunga mkono mkataba huo wa Umoja wa Mataifa kuhusu Uhamiaji ulioridhiwa na nchi 164.

Makubaliano hayo yameafikiwa baada ya miaka kadhaa ya juhudi zilizoungwa mkono na Rais wa zamani wa Marekani, Barack Obama licha ya kukataliwa na Mtawala wa sasa, Donald Trump.

Watetezi wa mkataba huo wanasema uhamiaji unaweza kusaidia uchumi wa kitaifa kwa kuimarisha nguvu kazi kwa nchi zilizoendelea na kwa kutoa chanzo cha fedha kwa nchi masikini kupitia utoaji wa fedha.

Hata hivyo wanaopinga makubaliano hayo wanasema yanaweza kuingilia uhuru wa kitaifa na kuchagiza uhamiaji zaidi duniani.

Masele awataka waAfrika kusimamia maslahi yao bila aibu wala woga

Makamu wa kwanza wa Rais wa Bunge la Afrika ambaye ni Mtanzania, Stephen Masele amehutubia Mkutano wa Dunia wa Mabadiliko ya Tabia Nchi na kusisitiza Afrika kuweka mkazo kwenye utekelezaji wa mkataba wa Paris ambao unayataka Mataifa yaliyoendelea kuchangia zaidi Mfuko wa Mazingira Duniani kwa kuwa ndiyo wanaochangia zaidi uharibifu wa mazingira na mabadiliko ya tabianchi.

Masele amewata wawakilishi wa Afrika katika majadiliano hayo kusimamia maslai ya Afrika bila aibu wala woga hususan kwenye masuala yanahusu michango ya kifedha kama ilivyokubaliwa katika mkutano wa Paris.

“Bunge la Afrika linaunga mkono msimamo wa wakuu wa nchi za Bara la Afrika na litaendelea kusimamia utungwaji wa Sheria zitakazolinda mazingira na kuthibiti madhara ya tabia nchi.” Alisema Masele katiba hutuba yake.

Makamu huyo wa kwanza wa Rais wa Bunge wa Afrika, ameyasema hayo katika Mkutano wa COP24 unaoendelea katika Jiji la Katowice nchini Poland.

Kwa upande wake, Mwenyekiti wa mkutano huo ambaye pia ni Naibu Waziri wa Mazingira wa Poland, Michal Kurtyrta alizitaka pande mbalimbali ziondoe maoni tofauti na kuhimiza kufikia makubaliano.

Kurtyrta amesema mkutano huo umekuwa wa mafanikio kwa kutolea mfano wa mwanzoni mwa mkutano huo ambapo Benki ya Dunia imetangaza kukusanya dola za kimarekeni bilioni 200 za kukabiliana na mabadiliko ya hali ya hewa, lakini kazi nyingi bado hazijamalizika. Amewataka mawaziri wa nchi mbalimbali kushikamana na kuonesha nguvu ya uongozi katika kutatua masuala yaliyokwama.

Macron kukutana na viongozi mbalimbali kumaliza vurugu

Rais wa Ufaransa, Emmanuel Macron amekutana na wanasiasa, viongozi wa vyama vya wafanyakazi na wafanyabiashara ili kusikiliza malalamiko yao.

Nchi ya Ufaransa imeshuhudia wiki nne zilizokuwa za maandamano yaliyokuwa yakipinga kupanda kwa kodi ya mafuta, gharama za maisha na masuala mengine.

Takribani waandamanaji 136,000 "waliovalia vizibao vya njano" waliingia mitaani Jumamosi iliyopita. Takribani waandamanaji  zaidi ya 1,200 walikamatwa na kuwekwa mahabusu.

Kufuatia maandamano hayo, mji mkuu wa nchi hiyo Paris umeathiriwa vibaya na vurugu huku madirisha yakivunjwa, magari yakichomwa moto na maduka yakiibwa baada ya watu takribani 10,000 kushiriki maandamano hayo.

Macron anatarajiwa kuhutubia taifa kwa njia ya luninga baadaye leo jioni ikiwa ni zaidi ya juma moja tangu atoa hotuba kwa taifa.

Miongoni mwa hatua ambazo serikali inakusudia kuchukua ni kuondoa kodi kwenye malipo ya muda wa ziada, kuharakisha punguzo la kodi na kutoa posho ya mwishoi wa mwaka kwa  wafanyakazi wa kipato cha chini.

Waziri wa Fedha, Bruno Le Maire amesema leo kuwa kuna uwezekano serikali ikachelewesha baadhi ya kodi ya mishahara, lakini ameelezea kutokuwa tayari kupunguza kodi kwa wastaafu, suala ambalo ni moja ya madai ya waandamanaji.

Amesisitiza kuwa hatua zinazochukuliwa zinapaswa kulenga katika kuwasaidia wafanyakazi .

Maandamano makubwa yanayoikabili Ufaransa yalianza kama vuguvugu  la kupinga ongezeko ya kodi za mafuta ambayo baadaye Macron aliiondoa lakini madai yameendele na kuzaa madai tata ikiwemo kumtaka Rais Macron kujiuzulu.

Rais Bush H.W aagwa kitaifa, watu maarufu watoa heshima zao

Mwili wa rais wa zamani wa Marekani George H.W.Bush umeagwa mjini Washington na kufuatiwa na ibada ya kanisani tukio lililowaleta pamoja viongozi na watu mashuhuri mbalimbali duniani kuhudhuria shughuli za kuagwa kwa rais huyo wa 41 wa Marekani.

Shughuli ya kuandaa mazishi zimefanyika katika Kanisa Kuu mjini Washington kuashiria maombolezo ya kitaifa ya siku tatu huku watu mashuhuri pamoja na wananchi wa kawaida wa Marekani wakiendelea kutoa heshima zao za mwisho kwa kiongozi huyo wa chama cha Republican ambaye alishuhudia kipindi cha mpito cha  vita baridi na kufanikiwa kuongoza vita vya ghuba ya Uajemi hususan nchini Iraq na kurithiwa na Bill Clinton wa Chama cha Democrat ambaye alimshinda katika uchaguzi wa mwaka 1992.

Miongoni mwa viongozi waliowasili mapema katika shughuli za maandalizi ya mazishi ya Bush katika Kanisa Kuu ni pamoja na makamu wa rais wa zamani wa Marekani, Dick Cheney, waziri wa ulinzi wakati wa utawala wake Colin Powell na mwenyekiti wake wa zamani mnadhimu wa majeshi na mtangazaji wa zamani wa habari na mtandao wa NBC, Tom Brokaw.

Marais wanne wa zamani ambao ni hai ni miongoni mwa watu mashuhuri waliokwenda kwenye shughuli za mazishi akiwemo George W.Bush ambaye pia ni mtoto wake wa kiume na ndiye aliyesoma wasifu wa marehemu Bush . Pia Rais Donald Trump alihudhuria shughuli hiyo.

Wengine waliopangwa kuhudhuria ni Mfalme na Malkia wa Jordan, Wana wa Wafalme wa Uingereza na Bahrain, Kiongozi wa Ujerumani Angela Markel na Rais wa Poland ni miongoni mwa watu mashuhuri kutoka nchi mbalimbali duniani.

Bush, ambaye alihudumu kama rais wa 41 wa Marekani kati ya mwaka 1989 na 1993, amefariki dunia Ijumaa iliyopita akiwa na umri wa miaka 94.

Atazikwa nyumbani kwake Texas pembeni mwa kaburi la mkewe Barbara. 

Wabunge Uingereza watoa karipio kali kwa Serikali

Wabunge nchini Uingereza wametoa karipio kali na la kihitoria kwa serikali yao kwa kushindwa kuchapisha kwa uwazi ushauri uliotolewa na wanasheria juu ya vigezo na masharti ya Uingereza kujiondoa katika umoja wa Ulaya.

Kura ya maoni inaelezwa kuwa na athari ndogo kwenye mjadala wa Uingereza kujiondoa katika Umoja wa Ulaya huku mvutano wa wazi baina ya Bunge na Serikali ukionekana waziwazi kwa wabunge kumshambulia Waziri mkuu, Theresa May aliyetambulisha mpango wa Uingereza kujitoa.   

Wabunge 311 wameunga mkono karipio hilo la Bunge dhidi ya wabunge 293 na wamesema hiyo ni ishara ya wazi kwamba kwa mara ya kwanza serikali imelidharau Bunge.

Suala la usalama ni kipaumbele katika siku tano (5) nyingine za mjadala katika Bunge huku wabunge kadhaa wakitarajia kuwa na sauti moja ikiwa mpango wa Waziri Mkuu Thereza May utakwama wiki ijayo.

Mpango wa Uingereza kujiondoa katika Umoja wa Ulaya ulipata baraka za Umoja huo lakini ni lazima uungwe mkono na Bunge la Uingereza, Disemba 11 watakapoamua ikiwa wakubaliane na mpango huo ama la!