Test
Yanga na Mbao FC katika mechi ya kisasi leo

Vijana wa Jangwani, Yanga SC leo wanashuka kwenye dimba la Taifa Dar es Salaam, kuikabili Mbao FC kutoka jijini Mwanza katika mchezo wa ‘kiporo’ wa Ligi Kuu Tanzania Bara, utakaokuwa mbashara Azam Sports 2 kuanzia saa 10:00 jioni.

Mchezo huo ni wa kulipa kisasi kwa Yanga, baada ya kuchapwa mabao 2-0 na timu hiyo kwenye mchezo wa mzunguko wa kwanza uliopigwa Disemba 31, 2017 kwenye dimba la CCM Kirumba jijini Mwanza.

Timu zote mbili ziko salama kwenye msimamo wa ligi zikiwa hazina hofu ya kushuka daraja na hakuna zinachotafuta zaidi ya kuwekeana heshima licha ya Yanga kuzihitaji alama tatu za leo ili kuwania nafasi ya pili.

Mchezo huu pia ni muhimu zaidi kwa Yanga kutaka kurejesha imani kwa mashabiki na ari kwa wachezaji wake kwani imetoka kupoteza michezo minne mfululizo ya ligi hiyo, jambo ambalo limewatia unyonge wapenzi na mashiki wake.

Kwa upande wa Mbao wanataka kuendeleza rekodi ya kuinyanyasa Yanga, kwani hadi sasa katika michezo mitatu ambayo timu hizo zimekutana, Mbao imeshinda michezo miwili, huku Yanga ikishinda mchezo mmoja.

Baada ya kunusurika kushuka daraja kwa kuichapa Stand United, Mbao wana pointi 30 wakiwa nafasi ya 13 huku Yanga waliotoka kuchapwa bao 1-0 na Mwadui FC wakiwa na pointi 48 katika nafasi ya tatu.

Baada ya kumkosa Salamba, Yanga yahamia kwa straika wa Ndanda

Klabu ya Yanga SC imeanza kumuwania mshambuliaji wa Ndanda SC, Tiber George kwa ajili ya kuiongezea nguvu safu yake ya ushambuliaji.

Licha ya taarifa hizo kueleza kwamba tayari Yanga imekwishafika mezani kwa ajili ya majadiliano na Ndanda, msemaji wake Dismas Ten amekataa kuthibitisha ukweli wake huku akisisitiza kuwa kamati ya usajili ndiyo inayohusika na masuala ya usajili.

Ten amesema Tiber ni mchezaji mzuri na anastahili kuichezea Yanga na kudokeza kuwa kipindi cha usajili kitakapofika, kamati yao ya usajili itaweka hadharani kila kitu.

“Ni mshambuliaji mwenye uwezo mkubwa, na kama akiendelea hivyo atafika mbali … kuhusu kuja Yanga, kamati ya usajili ndiyo inahusika lakini anaweza kucheza timu yoyote kwa sababu mpira ni kazi yake,” amesema Ten.

Kwa upande wake mchezaji mwenyewe amesema yuko tayari kujiunga na timu yoyote inayomuhitaji ikiwemo Yanga endapo itafikia makubaliano na uongozi wa Ndanda.

Taarifa hizo zinakuja ikiwa ni siku chache baada ya ombi la Yanga kumuomba mshambuliaji wa Lipuli FC Adam Salamba, kugonga mwamba kwa kile kilichoelezwa na Lipuli kuwa kanuni haziruhusu.

Iniesta aagwa kwa heshima Barcelona

Nahodha wa Barcelona Andres Iniesta usiku wa kuamkia leo ameagwa rasmi kwenye Ligi Kuu nchini Hispania akiiongoza timu yake kupata ushindi wa bao 1-0 dhidi ya Real Sociedad kwenye dimba la Camp Nou.

Bao pekee la Barcelona ambalo lilikuwa ni kama zawadi kwa Iniesta, lilifungwa na Philippe Coutinho dakika ya 57.

Iniesta mwenye umri wa miaka 34 sasa anaondoka Barca baada ya miaka 22 tangu ajiunge nayo mwaka 1996 akiwa na umri wa miaka 12 akianzia kituo cha vipaji cha La Masia kabla ya kupandishwa kikosi cha kwanza mwaka 2002.

Akiwa na Barcelona ameshinda jumla ya mataji 22, ambayo ni tisa ya La Liga, manne ya Mabingwa Ulaya (UEFA Champions League), matatu ya Klabu Bingwa ya Dunia na mataji sita ya Kombe la Mfalme (Copa del Rey).

Baada ya kuachana Barcelona akiwa ameichezea michezo 674, Iniesta anatajwa kutimkia ama China au Marekani.

Ngorongoro Heroes yatupwa nje safari ya AFCON U20

Timu ya Taifa ya vijana chini ya umri wa miaka 20, Ngorongoro Heroes inarejea nyumbani baada ya kutupwa nje ya mbio za kuwania tiketi za Fainali za Afrika kwa Vijana wenye umri chini ya miaka 20 baada ya kuchapwa mabao 4-1 na wenyeji, Mali kwenye mchezo uliopigwa usiku wa jana, mjini Bamako.

Matokeo hayo yanamaanisha Tanzania inatolewa katika kinyang’anyiro cha kuelekea nchini Niger mwakani kwa jumla ya mabao 6-2, baada ya kukubali kipigo cha mabao 2-1 kwenye mchezo wa kwanza Mei 13 kwenye Uwanja wa Taifa Jijini Dar es Salaam.

Mali sasa itakutana na Cameroon katika hatua ya mwisho ya mchujo kuelekea Niger 2019, ambayo imeitoa Uganda kwa penati 5-4 baada ya sare ya jumla ya 1-1, kila timu ikishinda 1-0 nyumbani kwake.

Azam yawaduwaza 'Wajelajela' Chamazi, yawapiga 4-1

Hat-trick iliyofungwa na mshambuliaji Shaaban Idd, imeisaidia Azam FC kuendeleza kasi yake ya ushindi ikiichapa Tanzania Prisons mabao 4-1, mchezo uliopigwa jana usiku kwenye Uwanja wa Azam Complex, Chamazi, Dar es Salaam.

Matokeo ya mchezo huo wa Ligi Kuu ya Vodacom Tanzania Bara (VPL) uliokuwa mkali na wa aina yake, yamezidi kuisafishia njia Azam FC ya kumaliza kwenye nafasi ya pili kwenye msimamo hadi sasa ikiwa inaishikilia ikifikisha pointi 55 ikiiacha Yanga iliyojikusanyia 48 huku ikiwa na mechi mbili mkononi.

Azam FC ilidhihirisha kuwa imepania kutoa dozi baada ya kujipatia bao la kwanza dakika ya 17 likifungwa kiufundi na Shaaban aliyeitumia pasi nzuri ya kiungo Frank Domayo ‘Chumvi’, ambaye alionyesha uelewano mzuri katikati mwa uwanja akiwa na Salum Abubakar ‘Sure Boy’ na Nahodha Himid Mao ‘Ninja’.

Domayo akaendeleza ubora wake kwa kuifungia bao la pili Azam FC dakika ya 22 akitupia kwa shuti la mbali lililomshinda kipa wa Prisons, Moses Matulanga, pasi safi akiipata kutoka kwa beki wa kushoto, Bruce Kangwa.

Shaaban alirejea tena wavuni dakika ya 31 akiindikia bao la tatu Azam FC akimtesa kipa kwa shuti la kukunja ‘curve’ baada ya kupokea pande kutoka kwa Sure Boy, ambaye aliweka uhai eneo la kati la timu yake kwa kuisambaratisha Prisons akishirikiana na viungo wenzake.

Wakati watu wakitarajia mpira ungeenda mapumziko kwa matokeo hayo, Shaaban alikamilisha hat-trick yake kwa kuipatia Azam FC bao la nne akitumia vema pasi ya juu ‘outer’ iliyopigwa na Domayo. Hiyo ni hat-trick ya kwanza kwa Shaaban kwenye ligi tokea apandishwe timu kubwa msimu uliopita.

Aidha hat-trick hiyo inamfanya Shabaan kufikisha jumla ya mabao manane kwenye ligi msimu huu akiwa ndiye mfungaji kinara wa Azam FC huku akijiwekea rekodi ya kufunga mabao sita ndani ya mechi nne mfululizo zilizopita za ligi.

Prisons ilijitutumua na kupata la kufuatia machozi dakika ya 70 lililofungwa kwa mkwaju wa penalti na mshambuliaji wao hatari, Mohamed Rashid na kufanya mpira kumalizika kwa ushindi huo mnono wa Azam FC.

Mara baada ya mchezo huo, kikosi cha Azam FC kinarejea mazoezini Jumanne jioni kuanza maandalizi ya kufunga pazia la ligi kwa kumenyana na Yanga Mei 28 mwaka huu, utakaofanyika Uwanja wa Taifa, Dar es Salaam.

Maandalizi ya kurudisha “Dakar Rally” Afrika yaanza

Mipango inaendelea ili kurudisha mashindano maarufu ya magari ya jangwani “Dakar Rally”, ambayo yalifanyika kwa mara ya mwisho barani Afrika muongo mmoja uliopita.

Kwa mujibu wa MkurugenzI wa Taasisi ya Michezo ya Amaury, Etienne Lavigne mashindano hayo yalisitishwa kutokana na matatizo ya usalama nchini Mauritania.

“Tumeshaandaa barabara za kutumiwa na madereva kwenye nchi zinazofahamika zaidi kwa mashindano hayo kama  nchini Algeria, Angola na Namibia ambapo tulikuwa na mazungumzo ya kiwango cha juu kwa miezi kadhaa”, Lavigne aliuambia mtandao wa AFP.

Tangu kusitishwa kwake mwaka 2008, mashindano hayo yamekuwa yakifanyika Marekani Kusini na toleo la mwaka 2019 litakuwa maalum na kufanyika nchini Peru ambayo itakuwa ni kwa mara ya kwanza kufanyika katika nchi moja katika historia yake ya miaka 41.

Hata hivyo taarifa zaidi zinasema, kutokana na hali mbaya ya kiuchumi nchini Argentina na Chile, sambamba na mikakati migumu ya kuendesha mbio hizo kumepeleka mbio hizo kurudishwa barani Afrika.

“Kama hatutaendesha Marekani Kusini, basi tunatakiwa tutafute sehemu yenye mandhari nzuri kwa mashindao ambayo itatupatia siku 10 hadi 12 za mashindano,” Lavigne aliimbia AFP.

“Hii inaweza kupatikana popote iwapo utapata muda wa kutazama kwa makini” aliongezea

Mwakani mashindano hayo yatafanyika Peru kati ya Januari 6 hadi 17.

Itakuwa ni ya vitanzi 10 vilivyowekwa kupitia kwenye jangwa nchini Peru, huku waandaaji wakikiri jangwa hili linatazamiwa kuwa na mchanga mwingi zaidi kwenye historia ya mashindano hayo.

Kwa mara ya kwanza mashindano hayo yalifanyika mwaka 1978 ambapo madereva walishindana kutoka mji mkuu wa Ufaransa, Paris hadi mji mkuu wa Senegal, Dakar.

Singida United yazidi kuizamisha Majimaji

Timu ya Singida United imefanikiwa kutumia vyema uwanja wake wa nyumbani baada ya kufanikiwa kupata ushindi wa magoli 3-2 dhidi ya Majimaji FC ya Mjini Songea.

Singida United walifanikiwa kufunga mabao matatu kupitia kwa Deus Kaseke, Shafiq Batambuze na Tafazwa Kutinyu hadi kipindi cha kwanza cha mchezo.

Kipindi cha pili Majimaji walibadilika na kuanza kushambulia lango la Singida United na kufanikiwa kufunga magoli mawili ambayo hayakuwa na msaada kwa upande wao kufuatia kupoteza mchezo kwa mabao 3-2.

Katika michezo mingine iliyopigwa leo, Yanga imeendelea kupoteza, ikifungwa mchezo wa tatu mfululizo kwenye ligi hiyo.

Leo mabingwa hao wa zamani wamechapwa bao 1-0 na Mwadui FC mchezo uliopigwa kwenye dimba la Kambarage Shinyanga, kwa bao la Awesu Ally Awesu dakika ya 19 ya mchezo.

Mjini Iringa Lipuli FC imepata ushindi wa bao 1-0 dhidi ya Mbeya City, bao likifungwa na Muda Chibwabwa dakika ya 81.