Test
Mwanariadha wa Ethiopia aliyemakinisha dunia wakati wa Olimpiki azawadiwa na serikali yake

Mwanariadha wa Ethiopia aliyeifanya dunia kumakinika na hali ya migomo na maandamano nchini humo wakati akimaliza mbio za Olimpiki zilizofanyika nchini Brazili kwenye jiji la Rio de Janeiro hatimaye amezawadiwa na serikali ya nchi yake.

Feyisa Lilesa, ambaye amepewa $17,000 (TZS 35m), amesema jitihada zake na magumu aliyopitia hatimaye yamefanikiwa kutokana na kuwepo kwa aina za uhuru zilizokuwa zikipiganiwa na watu wa kabila la Omoro.

Mwanariadha huyo alimaliza mbio hizo akiwa kwenye nafasi ya pili na wakati wa kumaliza mbio hizo za mwaka 2016 alipishanisha mikono yake juu ya usawa wa kichwa chake kuashiria kufungwa minyororo ikiwa ni alama ya kukandamizwa kwa waandamanaji nchini mwake.

Aliendelea kusalia uhamishoni kwa miaka miwili zaidi akisema maisha yake yalikuwa hatarini.

Kufuzu Olimpiki: Twiga Stars yavutwa shati na DRC

Timu ya soka ya Taifa ya Wanawake ya Tanzania, Twiga Stars, imeanza kwa sare ya mabao 2-2 kampeni ya kusaka tiketi ya Kufuzu Olimpiki ya Tokyo 2020 dhidi ya Jamhuri ya Kidemokrasia ya Congo.

Magoli ya Tanzania yamefungwa na Donesia Daniel dakika ya 46 na Asha Rashid dakika ya 79, huku mabao ya DRC yakiwekwa kimiani na Marilene Yav dakika ya 11 na Grace Balongo dakika ya 54.

Kwa matokeo ya leo, Twiga Stars, itahitaji ushindi wa bao 1-0 ugenini ili iweze kuitupa nje DRC, hivyo, benchi la Ufundi na Watanzania wanatakiwa kuwapa sapoti zaidi akina dada hao ili waende Olimpiki ya Tokyo 2020.

Serengeti Boys yatwaa kombe nchini Rwanda

Timu ya Taifa ya vijana ya Tanzania chini ya miaka 17 Serengeti Boys imeendelea kuwa na mfululizo wa kupata matokeo mazuri na mafanikio kwenye mashindano mbalimbali ya kimataifa wanayoshiriki baada ya Aprili 4 mwaka huu kuongeza taji lingine la ubingwa.

Katika mashindano maalum ya siku chache yaliyoandaliwa na shirikisho la soka la Rwanda (FERWAFA) imeshuhudiwa kwa mara nyingine tena Serengeti Boys ikimaliza mashindano hayo kama bingwa wake.

Licha ya sare ya mabao 3-3 na wenyeji Rwanda katika mchezo wa mwisho, Serengeti Boys ameshinda taji hilo baada ya kufikisha alama 4 zitokazonazo na ushindi wa 2-1 dhidi ya wanafainali wenza wa AFCON timu ya Cameroon pamoja na sare hiyo dhidi ya Rwanda.

 

Kwenye mchezo huu Rwanda ndiyo waliotangulia kupata mabao mawili ndani ya dakika 20 za kwanza, lakini Serengeti Boys wakatulia na kujibu mapigo, wakianza kufunga bao la kwanza dakika ya 30 kupitia kwa Edmund John, kisha Edmund John tena akaisawazishia Serengeti dakika ya 49 kabla ya Edson Mshirakandi kuifungia Tanzania bao la tatu dakika ya 83.

Cameroon wao wamemaliza wa pili na alama zao tatu walizozipata kufuatia ushindi wa 3-1 dhidi ya wenyeji Rwanda na wakipoteza mechi yao ya pili dhidi ya Serengeti Boys.

Wenyeji Rwanda walioanza kwa kipigo wamefanikiwa kuvuna alama moja pekee baada ya kuisawazishia Serengeti Boys dakika za mwishoni hii leo.

Rasmi mashindano hayo ya mechi mbili mbili yamemalizika ambapo Serengeti Boys na Cameroon zinataraji kuja katika ardhi ya Tanzania tayari kwaajili ya fainali za AFCON kwa vijana zitakazoanza April 14 mwaka huu.

Yanga yalazimishwa sare tena na Ndanda SC

Ndanda SC ‘Wanakuchere’ wameilazimisha sare ya bao 1-1 Yanga SC katika mchezo wa Ligi Kuu Tanzania Bara uliopigwa leo kwenye uwanja wa Nangwanda Sijaona mjini Mtwara.

Ndanda ndiyo waliotangulia kupata bao dakika ya 20 kupitia kwa Vitalisy Mayanga lakini Yanga wakasawazisha kwa kichwa cha Papy Tshishimbi aliyemalizia krosi ya Kelvin Yondan dakika ya 62.

Hata hivyo dakika ya 29 Yanga walipoteza nafasi ya bao baada ya Amissi Tambwe kukosa mkwaju wa penati waliyoipata kutokana na Heritier Makambo kuchezewa rafu ndani ya eneo la hatari. 

Matokeo haya ni sawa na yale ya raundi ya kwanza kwenye uwanja wa Taifa Dar es Salaam ambapo timu hizo zilitoka sare ya bao 1-1.

Matokeo hayo yameendelea kuiweka Yanga kileleni licha ya kupunguzwa kasi yake, sasa ikifikisha pointi 68, mbele ya Azam FC wenye pointi 62 huku Ndanda SC wakifikisha pointi 37 na kusogea hadi nafasi ya 11 kutoka nafasi ya 15.

Mvua yavunja yaahirisha mechi ya Simba na JKT

Mchezo wa ligi kuu soka Tanzania Bara kati ya Simba na JKT Tanzania uliokuwa uchezwe leo kwenye uwanja wa Jamhuri mkoani Morogoro umeahirishwa kutokana na mvua kubwa kunyesha mkoani humo.

Akizungumzia sababu za uamuzi huo, Msimamizi wa Kituo ambaye pia ni Katibu wa Chama cha Soka mkoani Morogoro Charles Mwakambaya amesema kutokana na hali ya uwanja kujaa maji, wamezungumza na waamuzi, pamoja na timu zote mbili na kukubaliana kuwa mchezo huo upangiwe tarehe nyingine.

Mwakambaya amesema licha ya kanuni kuelekeza kuwa mchezo huo uchezwe siku inayofuata, hilo limeshindikana kutokana na Simba kukabiliwa na mchezo wa Kimataifa dhidi ya TP Mazembe Aprili 6 mwaka huu ambao unawahitaji kuwa si chini ya saa 72 kabla ya kuucheza.

Kuhusu mashabiki waliokuwa wameshalipa viingilio kwaajili ya mchzo huo, Mwakambaya amesema chama cha soka mkoani humo kitaweka utaratibu wa kukata kiu yao.

John Bocco na kocha wake watwaa tuzo za mwezi Machi, TPL

Mshambuliaji wa timu ya Simba SC ya Dar es Salaam, John Bocco amechaguliwa kuwa Mchezaji Bora wa mwezi Machi wa Ligi Kuu Tanzania Bara (TPL) msimu wa 2018/2019.

Bocco ametwaa tuzo hiyo baada ya kuwashinda wenzake wawili, Donald Ngoma wa Azam FC na Jaffari Kibaya wa Mtibwa Sugar SC alioingia nao fainali katika uchambuzi uliofanywa na Kamati ya Tuzo ya TPL inayotolewa na Shirikisho la Mpira wa Miguu Tanzania (TFF).

Kwa mwezi huo wa Machi, Simba ilicheza mechi tatu na kushinda zote, ambapo Bocco alitoa mchango mkubwa kwa timu yake akifunga mabao manne na kuifanya Simba iendelee kubaki nafasi ya tatu.

Kwa upande wa Ngoma alikuwa na mchango mkubwa katika mafanikio ya Azam FC kwa mwezi huo, ambapo timu yake ilicheza mechi tatu ikishinda zote na kuendelea kubaki nafasi ya pili, akifunga mabao manne.

Mshambuliaji Kibaya alikuwa chachu ya mafanikio ya Mtibwa Sugar SC ambayo ilicheza mechi nne, ikishinda tatu na kupoteza moja, huku ikipaa kutoka nafasi ya 12 hadi ya sita katika msimamo wa ligi hiyo inayoshirikisha timu 20.

Kwa kuibuka mchezaji bora, Bocco atazawadiwa sh. 1,000,000 (milioni moja) na kombe (trophy) pamoja na kisimbusi kutoka Azam TV ambao ndiyo wenye haki ya matangazo ya TPL.

Pia Kamati ya Tuzo, imemchagua Kocha Mkuu wa Simba, Patrick Aussems kuwa Kocha Bora wa Machi akiwashinda Kocha Mkuu wa Azam, Abdul Mingange na Kocha Mkuu wa Mtibwa Sugar, Zuberi Katwila.

Aussems ameifanya Simba iendelee kung’ara katika ligi hiyo ambapo kwa mwezi huo ilishinda michezo yote mitatu iliyocheza ikiwa nafasi ya tatu katika msimamo wa ligi hiyo.

Kocha huyo pia atazawadiwa sh. 1,000,000 (milioni moja) na kombe (trophy).

TFF ina utaratibu wa kuwazadia wachezaji bora wa kila mwezi, huku pia mwisho wa msimu kukiwa na tuzo mbalimbali zinazohusu ligi hiyo.

Azam, Mbeya City zafanya kweli ligi kuu

Azam FC imepata ushindi wa bao 2-0 dhidi ya Kagera Sugar FC katika mchezo wa Ligi Kuu Tanzania Bara uliopigwa leo kwenye Uwanja wa Nyamagana Jijini Mwanza.

Mabao ya Azam yamefunga na Frank Domayo dakika 4 na Donald Ngoma dakika ya 85 akifunga kwa penati baada ya kipa wa Kagera Sugar Jeremiah Kisubi kumchezea madhambi Danny Lyanga wa Azam FC ndani ya eneo la hatari.

Ushindi huo umeifanya Azam izidi kujiweka salama kwenye nafasi yake ya pili ikifikisha pointi 62, ikiwa ni pointi tano nyuma ya vinara Yanga SC wenye pointi 67 na pointi tano mbele ya Simba wenye pointi 57 katika nafasi ya tatu.

Katika mchezo mwingine uliopigwa leo Bao pekee la Iddy Selemani 'Naldo' limeipa Mbeya City pointi tatu muhimu dhidi ya KMC kwenye Uwanja wa Sokoine Jijini Mbeya.

Matokeo hayo yameifanya Mbeya City kupanda kutoka nafasi ya tisa hadi ya saba ikifikisha pointi 40, huku KMC ikisalia kwenye nafasi yake ya tano ikiwa na pointi 40.

Ligi hiyo inaendelea kesho Jumatano kwa michezo saba kama ifuatavyo.

Simba SC vs JKT Tanzania

Ruvu Shooting vs Mtibwa Sugar.

Lipuli FC vs African Lyon.

Singida United vs Alliance FC.

Mbao FC vs Biashara United.

Tanzania Prisons vs Mwadui FC.

Coastal Union vs Stand United.